Byltyr salyq túsimi 2,4 trln teńgege az boldy – Qarjy mınıstri
«Jalpy pandemııaǵa baılanysty 2020 jyly salyq túsimderiniń tómendeýi 2,4 trln teńgege baǵalanady. Bul rette, esepti kezeńde negizinen salyqtyq-kedendik ákimshilendirýdi jetildirý men tsıfrlandyrýdyń esebinen 710 mlrd teńge qosymsha túsimder qamtamasyz etildi. Astana-1 aqparattyq júıesi engizilgennen bastap, kedendik deklaratsııalar 100 paıyz qashyqtan usynylady. Eger buryn biz ónim berýshiler men satyp alýshylar arasyndaǵy mámilelerdi tek esepti kezeń aıaqtalǵannan keıin, ıaǵnı jarty jyldan keıin ǵana kóretin bolsaq, qazir Elektrondyq shot-faktýralar esebinen onlaın rejımde kóre alamyz», - dedi Qarjy mınıstri.
Onyń aıtýynsha, nátıjesinde kameraldyq baqylaý tıimdiliginiń 1,5 ese ósýi qamtamasyz etildi. Sýbektilerge tekserispen shyqpaı-aq, olar ózderi bıýdjetke 490 mlrd teńge tóledi. 2020 jyldan bastap onlaın baqylaý-kassa mashınalaryn qoldanýǵa jappaı kóshý júrgizildi. Qazirgi ýaqytta onlaın baqylaý-kassa mashınalarynyń úlesi 97 paıyzǵa jetti.
«Bıyl tsıfrlandyrýdy keńeıtý boıynsha sharalar qabyldaý jalǵasatyn bolady. Onyń ishinde qosylǵan qun salyǵyn tóleýdiń durystyǵyn onlaın ákimshilendirý úshin blokcheın tehnologııasyn engizý, iri salyq tóleýshilerdiń «gorızontaldy monıtorıngin» jetildirý, salyqtan jaltarýdyń transulttyq shemalaryn anyqtaý úshin Ekonomıkalyq yntymaqtastyqty damytý uıymymen jáne halyqaralyq uıymdarmen málimetter almasý josparlanýda», - dedi mınıstr.
