Byltyr sal dertimen aýyrǵan 37 elordalyq ońaltýdan keıin aıaqqa turdy
ASTANA. QazAqparat – Búginde 5 556 elordalyq arnaýly áleýmettik qyzmettermen qamtyldy. Bul týraly bas shahardyń kommýnıkatsııalar qyzmetinde ótken brıfıngide Astana qalalyq Jumyspen qamtý jáne áleýmettik qorǵaý basqarmasy basshysynyń orynbasary Azamat Ospanov aıtty, dep habarlaıdy QazAqparat tilshisi.
«Basqarma jyl saıyn memlekettik áleýmettik tapsyrys sheńberinde arnaýly áleýmettik qyzmetter kórsetý bóliginde úkimettik emes uıymdardy qarjylandyrýdy júzege asyrady. Búgingi kúni qalada erekshe qajettilikteri bar balalarǵa arnalǵan arnaýly áleýmettik qyzmetter kórsetetin 8 úkimettik emes uıym jumys isteıdi. Búgingi kúni arnaýly áleýmettik qyzmettermen 5 556 adam qamtyldy, 2022 jyly 5189 adam qamtyldy», - dep toqtaldy Azamat Ospanov.
Spıkerdiń aıtýynsha, ońaltý qyzmetterin alǵannan keıin aıaqqa turyp ketken elordalyqtar az emes.
«Jansaıa» áleýmettik qyzmet kórsetý ortalyǵynyń qyzmetimen 640 adam qamtyldy. Byltyr munda 5 adam ońaltý sharalarynan keıin óz betinshe aıaqqa turdy, 140 naýqasta sóıleýdiń damý dınamıkasy baıqalady. Ata-analardyń, áleýmettik qyzmetkerlerdiń jáne mamandardyń keshendi jumysynyń arqasynda tserebraldy sal aýrýy dıagnozy qoıylǵan 37 qyzmet alýshy aıaǵyna turyp, óz betinshe júrýdi úırendi. Al, «Nurly júrek» ortalyǵynyń 3 tárbıelenýshi túzetý mektebine aýystyryldy jáne 7 tárbıelenýshi óz otbasyna oraldy. Bul mamandardyń tıimdi jumysyn jáne tárbıelenýshilerdiń damý kórsetkisheriniń jaqsarǵanyn kórsetedi», - dep nátıjelerdi baıandady Azamat Ospanov.
