Byltyr óndiristegi jazataıym oqıǵalardan 200-den astam adam qaza tapty
«Byltyr óndiristik jaraqattaný koeffıtsıenti (1000 jumyskerge shaqqandaǵy jazataıym oqıǵalardyń jıiligi) 0,22-ni qurady. Respýblıkanyń ónidiristik aımaqtarynda jaraqat alýdyń eń joǵary deńgeıi saqtalýda. Máselen, Qaraǵandy oblysynda – 180, ShQO-da – 169, Qostanaı oblysynda – 142, Pavlodar oblysynda – 112, Aqtóbe oblysynda – 103, Almaty qalasynda 114 adam zardap shekti», - dep jazdy komıtetten.
Ekonomıkanyń salalary boıynsha eń kóp zardap shekkender taý-ken metallýrgııa kesheniniń ónerkásipterinde – 16,2 % jáne qurylys salasynda – 15 %.
Jazataıym oqıǵalardyń oryn alýynyń negizgi sebepteri: jábirlenýshiniń óreskel abaısyzdyǵy (33,9%); óndiristegi jumystyń tıisti deńgeıde uıymdastyrylmaýy (29%); jol qozǵalysy erejelerin buzý (9,4%); qaýipsizdik jáne eńbekti qorǵaý erejelerin buzý.
«Sońǵy bes jyldyń ishinde memlekettik organdar men jumys berýshilerdiń eńbekti qorǵaý salasy boıynsha qabyldanǵan keshendi sharalardyń nátıjesinde óndiristik jaraqattaný deńgeıi 6,5%-ǵa tústi. Profılaktıka men buzýshylyqty aldyn alý maqsatynda elimizdiń 2800 kásiporny qaýipsizdik pen eńbekti qorǵaý standarttaryn engizdi.
Sondaı-aq, Qazaqstan Respýblıkasynyń Kásipodaqtar federatsııasymen birlesip, múgedektigi bar adamdardy «halyqtyq baqylaýshy» retinde tartýdy kózdeıtin «Halyqtyq baqylaý» áleýmettik mańyzdy jobasy engizilýde. Búgingi kúni jobany júzege asyrýǵa respýblıkanyń 240 kásiporny qosylyp, onda 600-den astam jumysker ishki baqylaýdy júzege asyrýda», - delingen vedomstvo habarlamasynda.
2019 jyldan bastap salalyq mınıstrlik tarapynan «Nóldik jaraqat - Vision Zero» tujyrymdamasyn jetildirý bolıynsha belsendi jumys atqarylýda. Oǵan búginde 332 kásiporyn qosyldy.
Sonymen qatar, «Onlaın eńbek konsýltanty» elektrondy servısi iske qosyldy. Ol jumysker men jumys berýshiniń arasynda qashyqtyqtan ózara árekettesýdi qamtamasyz etý úshin eńbek zańnamasynyń saqtalýynyń tıimdiligin arttyrýǵa múmkindik beredi. Servıs jumys berýshiniń eńbekti qorǵaý talaptarynyń saqtalýyn ózindik tekserýden ótýin qarastyrady. Servıs iske qosylǵaly beri 13 854 jumys berýshi ony paıdalandy.
