Byltyr óńdeý ónerkásibine salynǵan ınvestıtsııa rekordtyq somaǵa shyqty
NUR-SULTAN. QazAqparat - Byltyr óńdeý ónerkásibindegi negizgi kapıtalǵa salynǵan ınvestıtsııa rekordtyq 1,55 trln teńgeni qurady. Bul bir jyl burynǵymen salystyrǵanda, qarjylaı túrde 1,5 ese, al fızıkalyq turǵyda 38,1 paıyzǵa artyq, dep habarlaıdy QazAqparat finprom.kz aqparat kózine silteme jasap.
«Bıylǵy birinshi toqsanda ınvestorlar belsendiligin tómendetti. Bul jergilikti daǵdarys qubylystaryn (Qańtar oqıǵasy) da, jahandyq geosaıası ahýaldy da eskere otyryp kútilgen jaǵdaı edi. Dese de qańtar-naýryz aılarynda sektorǵa kapıtaldyq salym mólsheri 226 mlrd teńgeni qurady. Bul Qazaqstan ónerkásibi salasyna salynǵan barlyq ınvestıtsııanyń 19,1%-yn quraıdy. Óńdeý segmentindegi basty úsh ınvestıtsııalyq magnıttik sala osy jyldyń birinshi toqsanynda ózgerissiz qaldy. Olar – metallýrgııa (94,5 mlrd teńge), tamaq (39,1 mlrd teńge) jáne hımııa ónerkásipteri (27,9 mlrd teńge)», - dep jazylǵan onda.
Byltyrǵy qorytyndyǵa nazar aýdarsaq, metallýrgııa ónerkásibinde negizgi kapıtalǵa salynǵan ınvestıtsııa kólemi – 492,6 mlrd teńgeni, tamaq ónerkásibinde – 154,2 mlrd teńgeni, al hımııa ónerkásibinde 462,6 mlrd teńgeni quraǵan.
Bir qyzyǵy, osy úsh salanyń ekeýi bir mezgilde óńdeý segmentiniń maksımaldy ónimin qamtamasyz etedi. Máselen, aǵymdaǵy jyldyń birinshi toqsanynda metallýrgııa ónerkásibindegi óndiris kólemi birden 2,3 trln teńgege jetti, bul óńdeýshi ónerkásip segmentindegi jalpy ónerkásip óniminiń 48,9 paıyzyn quraıdy.
