Byltyr memorgan saıttaryna 1,4 mln márte kıbershabýyl jasalǵan

NUR-SULTAN. QazAqparat - Onyń ishinde 15 myńnan astam shabýyl Egov.kz aqparat júıesine jasalǵan, dep habarlaıdy QazAqparat.

«Memlekettik tehnıkalyq qyzmet» AQ ınternettiń qazaqstandyq segmentinde byltyr jáne bıyl jasalǵan kıbershabýyldar týraly aqparat taratty.

Oǵan sáıkes memlekettik organdardyń ınternet-resýrstaryn qorǵaý úshin ınternetke qol jetkizýdiń biryńǵaı shlıýzi paıdalanylǵan.

Qarapaıym sózben aıtqanda, atalǵan shlıýz - trafıkti ártúrli shabýyldardan tazartatyn jáne olardyń ınternet resýrsqa áser etýine jol bermeıtin erekshe fıltr.

Búgingi kúni 200-den astam memorgan saıty álgi shlıýz qorǵaýymen qamtamasyz etilgen.

Ótken jyly ınternetke qol jetkizýdiń biryńǵaı shlıýzin paıdalana otyryp shamamen 82,3 mln shabýyl buǵattaldy, onyń 1,4 mln astamy memorgan saıttaryna baǵyttalǵan.

Sonyń ishinde 15 myńnan astamy - egov.kz-ke jasalǵan shabýyldar.

Sonymen qatar elektrondy úkimettiń aqparattyq qaýipsizdigin qamtamasyz etý úshin turaqty negizde monıtorıng júrgiziledi.

Osylaısha byltyr 37 aqparattandarý obektisinen 4 326 aqaý tabylǵan.

Budan basqa, 2021 jyly jahandyq ınternet jelisinde DDoS-shabýyldar sanynyń artýy saldarynan Kaznette mańyzy ártúrli 120 myńǵa jýyq DDoS-shabýyl tirkeldi.

Qashyqtan oqytý kezeńinde bilim portaldaryna 29 shabýyl jasalǵan.

Bıyl toıtarys berilgen kıbershabýyl sany 28,5 mln asty.