Byltyr mashına jasaý salasynda quny 3 trln teńgeden asatyn ónim óndirildi – Prezıdent
Plenarlyq otyrystyń ashylýynda QR Premer-Mınıstri Álıhan Smaıylov Memleket basshysy Qasym-Jomart Toqaevtyń quttyqtaý sózin oqyp berdi.
«Qurmetti jıynǵa qatysýshylar! Sizderdi Qazaqstan mashına jasaýshylarynyń XI forýmynyń ashylýymen quttyqtaımyn! Bul forým osy salany órkendetýge yqpal etetin tyń tásilder tabýǵa arnalǵan tıimdi dıalog alańyna aınaldy. El ekonomıkasyn ártaraptandyrý úshin ınnovatsııaǵa jáne ozyq tehnologııaǵa negizdelgen óńdeý ónerkásibin qarqyndy damytý óte mańyzdy. Osy strategııalyq maqsatqa jetý jolynda mashına jasaý óndirisi aıryqsha ról atqarady. Byltyr bul salada jalpy quny 3 trln teńgeden asatyn ónim óndirildi. Taýar túrleri, eksport kólemi kóbeıdi, myńdaǵan jumys orny ashyldy. Oǵan kásiporyn ujymdarynyń qajyrly eńbegi, memlekettiń ornyqty saıasaty jáne aýqymdy qoldaý sharalary zor septigin tıgizdi», - dep jazylǵan Prezıdent quttyqtaýynda.
Memleket basshysy mashına jasaý ónerkásibine ınvestıtsııa salýǵa qolaıly jaǵdaı jasap, onyń básekege qabiletin arttyrý qajettigin basa aıtty.
«Sol úshin meniń tapsyrmammen keshendi jospar jobasy ázirlendi. Onda kórsetilgen is-sharalardyń tabysty júzege asyrylýy osy salanyń tyń qarqynmen damýyna jáne elimizdiń órkendeýine barynsha yqpal etedi dep senemin. Óz óndirisimizdi jandandyrý, tereń óńdelgen ónimderdi kóbirek shyǵarý jáne birtindep syrtqy naryqtarǵa shyǵý – bizdiń basty mindetimiz. Sizder bul mindetti abyroımen oryndaı alatyndaryńyzǵa senimdimin. Forým jumysyna tabys tileımin! Eńbekterińiz jemisti bolsyn», - delingen Qasym-Jomart Toqaevtyń quttyqtaý sózinde.