Byltyr qyzmetkerleri jemqorlyqqa jol bergen 14 top menedjer jazalandy – agenttik
Bul týraly QR Sybaılas jemqorlyqqa qarsy is-qımyl agenttigi tóraǵasynyń orynbasary Ulan Sarqulov aıtty.
«Kvazımemlekettik sektor sýbektileriniń basshylary sybaılas jemqorlyqtyń aldyn alý sharalaryna ózderi múddeli bolýy tıis, óıtkeni bul olardyń da jaýapkershiligi. Mysaly, ótken jyly kvazımemlekettik sektordyń 14 top menedjeri qaramaǵyndaǵy qyzmetkerlerdiń sybaılas jemqorlyǵy úshin túrli tártiptik jaýapqa tartyldy», - dedi U. Sarqulov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, memleket kvazımemlekettik sektorda sybaılas jemqorlyqqa qarsy birqatar sharany qolǵa alǵan. Bir kózden satyp alý negizderi aıtarlyqtaı qysqarǵan.
«2021 jyldan bastap kvazımemlekettik sektorda esep berýdi kúsheıtý maqsatynda qoǵamdyq keńester qurylyp jatyr. Kvazımemlekettik sektorda sybaılas jemqorlyq buzýshylyqtarynyń yqtımal sýbektileriniń aýqymy keńeıtildi. Olarǵa satyp alýdy uıymdastyrý jáne ótkizý jóninde sheshimder qabyldaýǵa ýákiletti nemese memlekettik bıýdjetten jáne Ulttyq qordan qarjylandyrylatyn jobalardy irikteý men iske asyrýǵa jaýapty adamdar engizildi», - dedi U. Sarqulov.
Buǵan deıin spıker memlekettik satyp alýda baǵany negizsiz kótergen sheneýnikti jazalaý usynylǵanyn habarlaǵan edi.
Sondaı-aq, árbir besinshi sybaılas jemqorlyq qylmysy memlekettik satyp alý salasynda jasalady. 2020 jyldan bastap bıylǵy 1 toqsanǵa deıin bul salada 418 qylmystyq is aıaqtaldy jáne 162 adam sottaldy.
