Byltyr Qytaıdan kelgen taýarlardan bıýdjetke túsken tólemder 60 paıyzǵa artyq boldy
«Joǵary aýdıtorlyq palata eksporttyq-ımporttyq statıstıkadaǵy alshaqtyq boıynsha qabyldanǵan sharalardyń jetkiliksiz áseri týraly atap ótken. Jalpy, álemdik tájirıbede barlyq elde taýarlardyń syrtqy saýdasynyń kedendik statıstıkasy derekterinde seriktes eldermen arada sáıkessizdik bolyp turady. Bundaı alshaqtyqtyń negizgi sebebi syrtqy saýda statıstıkasyn qalyptastyrýdyń ádistemelik ereksheliginde. Degenmen, alshaqtyqty azaıtý maqsatynda júıeli sharalar qabyldanyp jatyr. Taýarlarǵa arnalǵan deklaratsııalardy baqylaý jáne shyǵarý úshin kedendik fýnktsııalardy ortalyqtandyrý júzege asyryldy», - dedi E. Jamaýbaev.
Bul turǵyda ol Memlekettik kirister komıteti janynan Bas dıspetcherlik basqarma qurylǵanyn aıtty. Osy qadam baqylaý sharalary boıynsha ortalyqtandyrylǵan sheshim qabyldaýǵa, ótkizý pýnktterindegi jaǵdaıǵa qashyqtan monıtorıng júrgizýge múmkindik beredi.
«Sondaı-aq, eksporttyq deklaratsııalarmen onlaın tártipte almasý júrip jatyr. Ondaı aqparat Qytaı Halyq Respýblıkasynan Qazaqstan aýmaǵyna taýarlar kelmeı turyp jetkiziledi. Bul kele jatqan taýarlar týraly aldyn ala aqparat alýǵa múmkindik beredi. Tıisti jumystyń nátıjesinde byltyr tek Qytaıdan keletin taýarlar boıynsha bıýdjetke 465 mlrd teńgege kedendik tólem men salyq túsken. Bul 2021 jylmen salystyrǵanda 60% artyq», - dedi Qarjy mınıstri.
