Byltyr keden organdarynyń jumys sapasy tómen bolyp, jekelegen túsimder bıýdjetke túspeı qaldy - Esep komıteti
ASTANA. Maýsymnyń 3-i. QazAqparat /Qanat Mámetqazyuly/ - Esep komıtetiniń tekseristeriniń nátıjesinde, byltyrǵy jyly keden organdary jumysynyń sapasy tómendegeni, sonyń saldarynan jekelegen túsimderdiń bıýdjetke túspeı qalǵan faktileri anyqtaldy. Búgin QR Parlamenti Májilisinde 2009 jylǵy respýblıkalyq bıýdjettiń atqarylýyn talqylaý barysynda Esep komıtetiniń tóraǵasy Omarhan Óksikbaev osylaı málim etti,
dep habarlaıdy QazAqparat.
Sóz arasynda Komıtet tóraǵasy Keden odaǵynyń júzege asýy barysynda, onyń ekonomıkalyq qaýipsizdigin jáne tıimdiligin arttyrýǵa baǵyttalǵan saýda operatsııalarynyń sapaly jumys isteýin qamtamasyz etý máselesine nazar aýdartty. Bul rette O. Óksikbaev salyq jáne keden organdarynyń qyzmetin retteıtin zańnamada birqatar kemshilikter jiberilgenin aıtyp, solardyń bastylaryna toqtaldy.
«Birinshiden, «taýarlardy kedendik aýmaqta qaıta óńdeý» kedendik rejımde ónimderdi syrtqa shyǵarýdyń Úkimet bekitken kóterińki normalary syrtqy ekonomıkalyq qyzmetke qatysýshylarǵa qaıta óńdelgen munaı ónimderin baj salyǵynsyz áketýdi ulǵaıtýǵa múmkindik berdi. Ekinshiden, keden zańnamasynda kedendik saraptamanyń maqsatyn retteıtin normanyń bolmaýy bıýdjettiń zııan shegýine áser etti. Úshinshiden, Salyq kodeksiniń normalary eseptilikke usynbaı, salyq tóleýden jaltarǵandardyń operatsııalyq shyǵyndaryn shegerim somasynan alyp tastaýǵa múmkindik berilgen joq. Tórtinshiden, bıýdjetke túsetin túsimderdiń táýekelderin baǵalaýdyń aıqyn ólshemderi ázirlenbegen. Osy ólshemder táýekeldi joıý úshin pármendi sharalardy ýaqytyly qoldanýǵa múmkindik berer edi», dedi O. Óksikbaev. Onyń aıtýynsha, joǵaryda kóterilgen máseleler Úkimet tarapynan sheshimin tapsa, bıýdjetke túsimder de ulǵaıa túser edi.
