Byltyr «QazTransGaz» áleýmettik nysandarǵa 8 mlrd teńgeden astam qarjy bólgen
ASTANA. QazAqparat - Byltyr «QazTransGaz» kompanııasy áleýmettik nysandarǵa 8 mlrd teńgeden astam qarjy jaratqan. Bul týraly búgin ótken baspasóz máslıhatynda kompanııa basshysy Serik Sultanǵalı málim etti.
«Mundaı nysandardyń qataryna Shymkent qalasyndaǵy oqý-kýrstyq kombınatynyń 100 oryndyq jataqhanasy, Jańqala eldi mekeninde salynǵan 2 páterli 2 turǵyn úı, Qyzylordadaǵy ákimshilik ǵımaraty jáne Astanadaǵy jekpe-jek ónerleri saraıy kiredi. Bulardyń barlyǵy áleýmettik mańyzy zor ǵımarattar dep aıtýǵa bolady», - dedi kompanııa basshysy.
Onyń aıtýynsha, jýyq arada paıdalanýǵa beriletin Astanadaǵy sport saraıy kúres, boks, dzıýdo sııaqty sporttyń kóptegen túrlerine laıyqtalyp jasalady. Sonymen qatar, kópfýnktsııaly keshende túrli kontsertter, merekelik sharalar ótkizip, balalarǵa arnalǵan úıirmeler ashýǵa bolady.
