Byltyr «Qazaqtelekomǵa» 600 mlrd teńge kiris kirgen

ASTANA. QazAqparat – Byltyr «qazaqtelekom» aktsıonerlik qoǵamy 600 mlrd teńgeniń kirsin kórip, sonyń altydan bir bóligin jańa qurylystarǵa jumsaǵan, dep habarlaıdy QazAqparat tilshisi.

Bul týraly «Qazaqtelekom» akıtsonerlik qoǵamynyń Innovatsııalar jónindegi bas dırektory Nurlan Meıirmanov málim etti.

«Kompanııanyń ınvestıtsııa salǵan kapıtalynyń kólemi óte úlken deýge bolady. Onyń negizgi bóligi jańa qurylystarǵa baǵyttalyp jatyr. Mysaly, bıyl 130 myń GPON portqa aqsha salmaqshymyz. Bul negizi úlken ınvestıtsııa bolyp esepteledi. Byltyr osy salaǵa 100 mlrd teńgeden artyq aqsha saldyq, onyń aldynda 90 mlrd teńgege deıin jumsaǵanbyz. 2023 jyly ınvestıtsııa kóleminiń kiriske qatysy aıtarlyqtaı joǵary bolady. Óıtkeni 5G tehnologııasy boıynsha ınvestıtsııalyq kezeńge ótip otyrmyz», - dedi ol ulttyq kompanııanyń 2022 jylǵy jumysyn talqylaǵan qoǵamdyq keńes otyrysynan keıin BAQ ókilderine bergen jaýabynda.

Sondaı-aq, «Qazaqtelekom» ókili aktsıonerlik qoǵamnyń jyldyq kirisin atady.

«Aldymyzda jańa mindettemeler paıda boldy. Investıtsııa kólemi byltyrǵydan sál joǵary bolady. Bul shamamen 100 mlrd teńge degen sóz. 2022 jyly kirisimiz 600 mlrd teńgeden astam boldy», - dedi Nurlan Meıirmanov.