Byltyr Qazaqstannyń AÓK-ne 1 mlrd dollardan astam ınvestıtsııa salyndy

NUR-SULTAN. QazAqparat - 2019 jyly ınvestorlar Qazaqstannyń AÓK-ne bir mıllıard AQSh dollarynan astam ınvestıtsııa saldy, dep habardaıdy QazAqparat AShM baspasóz qyzmetine silteme jasap.

«Ótken jyly Qazaqstannyń aýyl sharýashylyǵyna ınvestorlar 429 mlrd teńgeden astam qarjy saldy. 2019 jyldyń qańtar-qarasha aılarynda aýyl sharýashylyǵyna ınvestıtsııa retinde 429,49 mlrd teńge tartyldy. Bul 2018 jyldyń 11 aıyndaǵy derektermen salystyrǵanda ósim 37,3% qurady.

Aıta ketý kerek, qomaqty qarjynyń 77%-nan astamy, ıaǵnı 328,2 mlrd teńge nemese 868 mln dollar ınvestorlar men bıznesmenderdiń qarajaty. Al, qalǵan 100 mlrd teńgege jýyq qarjy bul bankter men nesıe berýshilerdiń qarajaty», delingen habarlamada.

Investorlar elimiz boıynsha eń kóp qarjyny, 93 mlrd 495,8 mln teńge ınvestıtsııa Soltústik Qazaqstan oblysynyń aýyl sharýashylyǵy salasyna (respýblıka boıynsha barlyq ınvestıtsııa somanyń 21,8%) salǵan.

SQO-na bólingen qarajattan eki ese az soma Aqmola, Qostanaı, Pavlodar jáne Túrkistan óńirlerine (44,2-49,7 mlrd teńge) tartylǵan.

Aıta ketý kerek, Pavlodar oblysy 2019 jyly agrosektorǵa 2018 jylǵa qaraǵanda úsh ese kóp ınvestıtsııa tartty.

Jalpy, 2019 jyl aýyl sharýashylyǵyna ınvestıtsııa tartý, sondaı-aq sheteldik seriktestermen uzaq merzimdi qarym-qatynas jasaý turǵysynan óte tabysty boldy.

Máselen, ótken jyly QR Prezıdenti Qasym-Jomart Toqaevtyń GFR-na resmı sapary barysynda QR Aýyl sharýashylyǵy mınıstrligi Germanııanyń Azyq-túlik jáne aýyl sharýashylyǵy mınıstrligimen birlesken málimdemege qol qoıdy.

QR Premer-mınıstri Asqar Mamınniń AQSh-qa jumys sapary aıasynda amerıkalyq agrobıznestiń kóshbasshylary Tyson Foods jáne Valmont Industries Qazaqstandaǵy etti qaıta óńdeý jáne sýarý júıelerin óndirý jónindegi kásiporyndardy ashýǵa baǵyttalǵan mańyzdy kelisimge qol qoıyldy.

Sondaı-aq, QR Aýyl sharýashylyǵy mınıstri Saparhan Omarov Argentına, Grýzııa, Germanııa, Iran, QHR, Estonııa memleketteriniń tıisti mınıstrlikteri men qurylymdarynyń basshylarymen AÓK salasyndaǵy damý jáne yntymaqtastyq máseleleri boıynsha birqatar kelisimderge, memorandýmdarǵa jáne kelisimderge qol qoıdy, Aýǵanstan, Bangladesh, Mysyr, Indonezııa, Túrkııa, Saýd Arabııa Úkimet múshelerimen, SALIC jáne United Green iri ınvestıtsııalyq kompanııalardyń basshylarymen kelissózder júrgizildi.

Sonymen qatar, Ózbekstan aýyl sharýashylyǵy mınıstrimen yntymaqtastyqty jandandyrý boıynsha Jol kartasyna qol qoıyldy, Lactalis jáne Danone frantsýz kompanııalarymen strategııalyq seriktestik jáne Qazaqstannyń «Sharýalarǵa arnalǵan mektep» qurý týraly kelisimge qol jetkizildi.