Byltyr Qazaqstannyn 6,8 mln. tonna astyq eksporttaldy - vıtse-premer
ASTANA. Naýryzdyń 9-y. QazAqparat /Qanat Mámetqazyuly/ - Elimizden byltyrǵy jyly 6,8 mln. tonna astyq eksportaldy. Búgin QR Premer-Mınıstriniń birinshi orynbasary Ómirzaq Shókeev Senatta ótken «Óńir» depýtattyq tobynyń otyrysynda osylaı málim etti,
dep habarlaıdy QazAqparat.
«Astyq naryǵyndaǵy jaǵdaıǵa keletin bolsaq, Statıstıka agenttiginiń málimetteri boıynsha, 2009 jyly jalpy astyq jıyny 20,8 mln. tonnany qurady. Al Kedendik baqylaý komıtetiniń málimetteri boıynsha, 2009 jyly astyqtyq balamadaǵy undy qosa esepke alǵanda 6,8 mln. tonna astyq eksporttalǵan. Bunyń ishinde jalpy astyq eksporty boıynsha undy eksporttaý úlesi jyl saıyn artyp keledi. Máselen, byltyr astyq eksportynyń jartysyna jýyǵyn un qurady. Bul aıtarlyqtaı mánge ıe bolatyn kórsetkish», dedi Ó. Shókeev.
Onyń aıtýynsha, tikeleı teńiz porttaryna shyǵa almaý qazaqstandyq astyqtyń álemdik naryqqa kirigýine kedergi bolyp otyr. Máselen, tek tranzıttik tarıftiń esebinen ǵana elimizdiń astyǵynyń árbir tonnasy 50 dollarǵa deıin qymbattap ketedi eken.
«Osyǵan baılanysty, Qazaqstan ózindik eksporttyq ınfraqurylym qurýǵa kirisip otyr. Bul bizdiń elimizdi astyq ótkizýdiń iri rynogyna shyǵarýǵa múmkindik beredi», dedi Ó. Shókeev.
