Byltyr Qazaqstannan et eksporttalǵan emes- «QazAgroÓnim» AQ
ASTANA. 12 sáýir. QazAqparat /Qanat Mámetqazyuly/ - Byltyr Qazaqstannan et eksporttalǵan emes. Bul týraly búgin «QazAgroÓnim» Aktsıonerlik qoǵamynyń uıymdastyrýymen ótken baspasóz máslıhatynda atalmysh kompanııanyń basqarma tóraǵasynyń orynbasary Aıgúl Ahmetjanova málim etti.
«1990-1999 jyldardaǵy kórsetkishke qarasaq, Qazaqstannyń et eksporty 180 myń tonnaǵa deıin jetken edi. Mine, bul shynaıy eksport, naqty kórsetkish edi. Alaıda sońǵy jyldary biz et áleýetin múldem quldyratyp aldyq. Máselen, 2009 jyly et eksporty bar-joǵy 300 tonnadan áreń assa, byltyrǵy 2010 jyly et eksporty múldem bolǵan joq. Sondyqtan da, biz búgin et áleýetin arttyrýǵa qatysty sharany nólden emes, quldyraýdan (mınýstan) bastaǵaly otyrmyz. Aldaǵy ýaqytta osy olqylyqtyń orynyn toltyrýymyz kerek», - deıdi A. Ahmetjanova. Sonymen qatar, kompanııa ókili Memleket basshysynyń aǵymdaǵy jylǵy Joldaýynda et eksportyna qatysty áleýetti arttyrý máselesine basymdyq berilgenin atap ótti. Prezıdent júktegen mindetke sáıkes, 2016 jyly Qazaqstannyń et eksporty 60 myń tonnany, 2020 jyly 180 myń tonnany quraýy tıis. «Osy mejeni baǵyndyrý úshin «Qazaqstan Respýblıkasynda iri qara mal etiniń eksporttyq áleýetin damytý» jobasy ázirlenip, júzege asýda», - dedi A. Ahmetjanova.
