Byltyr Qazaqstanǵa 16 myńnan astam oralmandar otbasy kóship keldi
Atalmysh kórsetkish 2015 jyly Otanyna oralǵandarǵa qaraǵanda 8 esege artyq. Degenmen, kelgen qandastarymyzdyń basym bóligi turǵylyqty jeri retinde Astana men Almaty qalalaryn jáne ońtústik óńirlerdi tańdaǵandyqtan, bul rette soltústik óńirlerge qonystanýdyń teris saldosy ulǵaıdy.
Jalpy, Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, 1991 jyldan 2017 jyldyń 1 sáýirine deıin 1 mıllıonnan astam etnıkalyq qazaq tarıhı atamekenine oralyp, oralman mártebesin aldy. 2016 jyly - 16,4 myń otbasy (33 754 adam), 2017 jyldyń 1 toqsanynda - 2,6 myń otbasy (4,9 myń adam).
«Osy oraıda 2016 jyly elimizge qonys aýdarǵan tulǵalardyń eńbekke jaramdy úlesi 56 paıyzdy qurasa, 18 jasqa deıingi balalar - 39% jáne zeınetkerler - 47% boldy. 2017 jyly elge oralǵandardyń 26,4%-yn 18 jasqa deıingi balalar, 67,3%-yn eńbekke jaramdy jandar, 6,3%-yn zeınetkerler ıelendi», - dep atap ótti mınıstr.
Kósh bet túzegen negizgi elderdiń ishinde byltyr jáne bıyl Ózbekstan (tıisinshe 2016 jyly 62% jáne 2017 jyly 54,5%), Qytaı ( 2016 jyly 14% jáne 2017 jyly 33,4%), Mońǵolııa (2016 jyly 9% jáne 2017 jyly 2,1%), Túrkimenstan ( 2016 jyly 6,7% jáne 2017 jyly 4,6%) memleketteri erekshe kózge túsedi.
2016 jyly, qonys aýdarýshylardy qabyldaýda 7 óńir (Aqmola, Atyraý, Shyǵys Qazaqstan, Batys Qazaqstan, Qostanaı, Pavlodar jáne Soltústik Qazaqstan oblystary) jáne kóshtiń qaınar kózi retinde 4 óńir (Almaty, Jambyl, Mańǵystaý jáne Ońtústik Qazaqstan oblystary) belgilengen. Joǵaryda keltirilgen óńirlerge qonys aýdarýdy uıǵarǵan otandastarymyzǵa kósh shyǵyndaryn jabatyn jáne bir jyl boıy baspana jaldaýǵa qajet qarjyny óteıtin qarjy bólinedi. 2017 jyly 2,7 myń azamattyń qonys aýdarýyna sýbsıdııa tóleý kózdelgen.
Bıylǵy 3-5 sáýir aralyǵy Ońtústik Qazaqstan oblysynyń eki aýdany men Shymkent qalasynda bos jumys oryndary jármeńkesi ótip, onda Qostanaı, Pavlodar, Soltústik Qazaqstan jáne Shyǵys Qazaqstan oblystarynyń 636 jumys berýshisi óndiris, bilim berý, densaýlyq saqtaý, memlekettik basqarý, aýylsharýashylyq, qurylys salalarynan 1785 jumys ornyn usyndy. Jármeńke qorytyndysynda 672 otbasy elimizdiń teriskeı aımaqtaryna qonys aýdarýǵa sheshim qabyldady. Osymen birge eńbek resýrstaryna suranysty qanaǵattandyrý men eńbek naryǵynyń mobıldiligin arttyrý máseleleri boıynsha Ońtústik Qazaqstan oblysy men Qostanaı, Pavlodar, Shyǵys Qazaqstan oblystary ákimdikteri arasynda yntymaqtastyq memorandýmyna qol qoıyldy.
Ústimizdegi jyly Mınıstrlik tarapynan 2017-2021 jyldarǵa arnalǵan Kóshi-qon saıasaty tujyrymdamasyn jasaý qolǵa alynyp, onda kóshi-qon úderisin tıimdi túrde retteý, ornyqty demografııalyq órkendeý men eldegi bilikti jumys kúshine suranysty qamtamasyz etý, ulttyq qaýipsizdikti nyǵaıtý máseleleri kórinis tabatyn bolady.
