Byltyr qazaqstandyqtarǵa 81 mlrd. teńge kóleminde aıyppul salynǵan
QR Bas prokýratýrasynyń Quqyqtyq statıstıka jáne arnaıy esepke alý jónindegi komıteti memlekettik organdardy, quqyqqorǵaý jáne sot júıesin tolyqqandy aqparatpen qamtamasyz etip otyrý úshin quqyqtyq statıstıka sýbektileri jumystarynyń statıstıkalyq kórsetkishterin qalyptastyryp, taldaý jasaıdy.
Ákimshilik quqyq buzýshylyq jáne ony jasaǵan adamdar týraly ortalyqtandyrylǵan bank málimetteri boıynsha, 2013 jyly 3 288 055 ákimshilik quqyq buzýshylyq jasalyp, olar boıynsha 80 mlrd.924 mln. teńgeniń aıyppulyn salý túrindegi ákimshilik jaza belgileý týraly 2659 289 qaýly shyǵarylǵan.
Elimizdiń bıýdjetine 42 mlrd. 954 mln. teńge, ıaǵnı salynǵan ákimshilik aıyppuldyń 53,1 paıyzy tústi.
Aıyppul óndirip alý boıynsha burynǵysynsha Ońtústik Qazaqstan oblysy (70,3 paıyz) men Almaty qalasy (68,4 paıyz) alǵashqy oryndarda tur. Al Aqtóbe (36,1), Soltústik Qazaqstan (36,4) jáne Qostanaı (38,6) oblystarynda bul kórsetkish respýblıkalyq ortasha kórsetkishten tómen.
Jalpy alǵanda elimizde ishki ister organdary anyqtaǵan qoǵamdyq tártip jáne jol qozǵalysy erejelerine qatysty quqyq buzýshylyqtar aldyńǵy orynda tur. Olar boıynsha salynǵan aıyppuldardyń naqty tıimdiligi 59,2 paıyzdy, ıaǵnı 10 mlrd. 381 mln. teńgeni qurady.
Ádilet organdarynyń óndirgen ákimshilik aıyppuldary -100 paıyzdy, qorǵanys mınıstrligi organdarynda - 99,1 paıyzdy, tótenshe jaǵdaılarda - 93,2 paıyzdy, densaýlyq saqtaý salasynda - 93 paıyzdy, ulttyq qaýipsizdikte - 91,2, aýyl sharýashylyǵy organdarynda - 85,6 paıyzdy quraǵan.
Al aıyppul óndirip alýdyń tómengi kórsetkishteri Tabıǵı monopolııalardy retteý agenttiginde - 11,2, UQK shekara qyzmetinde - 20,3 paıyz, Monopolııaǵa qarsy komıtette - 51 paıyz jáne salyq organdarynda 53,4 paıyz bolyp otyr.
