Byltyr Qazaqstanda dene shynyqtyrý jáne sportpen 4,5 mln. adam qamtyldy - QR MSM

ASTANA. QazAqparat - Byltyr elimizde halyqtyń 26 paıyzy nemese 4,5 mln. adam dene shynyqtyrýmen jáne sportpen qamtyldy. Búgin Májilistegi buqaralyq sportty jáne dene shynyqtyrýdy damytý taqyrybynda ótken Úkimet saǵatynda Mádenıet jáne sport mınıstri Arystanbek Muhamedıuly osylaı málim etti.

«Memleket basshysy N. Nazarbaev óziniń Joldaýynda «buqaralyq sport keshendi qadamdardy talap etedi, óıtkeni tek deni saý ult qana básekege qabiletti ult bola alady» degen edi. Osy mindetter aıasynda bizdiń mınıstrliktiń memlekettik saıasatynyń biri buqaralyq dene shynyqtyrý sportyn damytý bolyp tabylady. Alǵa júktelgen mindetter aıasynda mınıstrlik qabyldaǵan sharalar nátıjesinde 2015 jyly dene shynyqtyrýmen jáne sportpen qamtylǵandar sany jalpy halyqtyń 26 paıyzyn nemese 4,5 mln. adamdy qurady. Sonymen qatar, byltyrǵy jyldyń qorytyndysy boıynsha Densaýlyq saqtaý jáne áleýmettik damý mınıstrliginiń Salaýatty ómir saltyn qalyptastyrý ortalyqtary 33 myńnan astam buqaralyq sporttyq sharalar men aktsııalar ótkizdi. Onyń ishinde 18 myńnan astam shara aýyldy jerlerde ótkizildi», - dedi A. Muhamedıuly.

Mınıstrdiń aıtýynsha, vedomstvonyń eń basty strategııalyq maqsattarynyń biri 2020 jylǵa qaraı elimizde otandastarymyzdyń otyz paıyzy dene shynyqtyrý jáne sportpen shuǵyldanýyn qamtamasyz etý bolyp tabylady.