Byltyr Qazaqstanda 12 lańkestik aktsııanyń joly kesildi

ASTANA. QazAqparat - Byltyr Qazaqstanda 12 lańkestik aktsııanyń aldy alyndy, dep habarlaıdy QazAqparat. Bul týraly búgin Úkimet otyrysynan soń tilshilerge bergen suhbatynda Ulttyq qaýipsizdik komıteti tóraǵasynyń orynbasary Nurǵalı Bilisbekov málim etti.

«2016 jyly Qazaqstan aýmaǵynda josparlanǵan 12 lańkestik jáne zorlyq-zombylyq aktsııanyń aldy alyndy. Árbir aktsııa jóninde brıfıngterde jeke-jeke toqtalǵan bolatynbyz. Osy baǵytta jumystardy jalǵastyryp jatyrmyz. Ókinishke qaraı, qaıǵyly oqıǵalar Qazaqstanda da oryn aldy, odan biz mańyzdy sabaq aldyq», - dedi Nurǵalı Bilisbekov.

UQK basshysynyń orynbasarynyń habarlaýynsha, Memleket basshysynyń tapsyrmasymen, Qaýipsizdik Keńesiniń sheshimimen 2017-2020 jyldarǵa arnalǵan Terrorızmmen kúres memlekettik baǵdarlamasy jasalýda.

«Jýyrda Úkimette tanystyrylady. Sol kezde men baǵdarlama týraly tolyq aıtyp bere alamyn. Onyń qaǵıdalary, ekstremızm men terrorızmge qarsy kúres sharalary men tetikteri jaıly baıandap beremin», - dedi ol.