Byltyr Qazaqstan mektepterindegi oryn tapshylyǵy 55 myńnan asty
ASTANA. QazAqparat - 2016 jyly Qazaqstanda mektepterdegi oryn tapshylyǵy 55 myńnan asyp tústi, dep habarlaıdy finprom.kz.
Statıstıkalyq derekterge sáıkes, 2015 jyly orta bilim mekemelerinde oryn tapshylyǵy 39,9 myńdy qurap, 2010 jylmen salystyrǵanda 60% azaıǵan edi. 2016 jyly birinshi synyp oqýshylarynyń sany 370 myńǵa kúrt artýyna (2015 jylmen salystyrǵanda +10%) baılanysty, oryn jetispeýshiligi 55,2 myńǵa deıin jetti.
Tapshylyqtyń artýyna sondaı-aq Qazaqstandaǵy jalpy bilim beretin mektepter sanynyń jyl saıyn azaıýy áser etýde. Ár jyly eldegi mektepter sany 1% qysqaryp otyrady, osylaısha, 2016 jyly respýblıka aýmaǵyndaǵy mektepter sany 7,37 myńdy qurady. Bul kórsetkishke apatty jaǵdaıdaǵy mektepterdiń 93-ten 37-ge deıin qysqarýy da óz yqpalyn tıgizbeı qoımady.
Sonymen qatar, mektepterdegi bilikti pedagogtar sany artyp keledi. Joǵary jáne birinshi sanattaǵy muǵalimder sany 2015 jyly 49,8% qurasa, 2016 jyly 50,7% deıin jetken. Eń joǵary kórsetkishter - Pavlodar oblysynda (58%), Astana (57%) jáne Almaty (56%) qalalarynda. Al eń tómengi kórsetkishter Mańǵystaý (44%), Ońtústik Qazaqstan (45%) jáne Aqtóbe (45%) oblystarynda belgilendi.
