Byltyr Qazaqstan ekonomıkasyna kóp ınvestıtsııa salǵan top-10 memleket

ASTANA. QazAqparat – BAQ ókilderiniń qatysýymen ótken brıfıngide Syrtqy ister mınıstriniń orynbasary Almas Aıdarov el ekonomıkasyna eń kóp ınvestıtsııa salǵan on eldi atady, dep habarlaıdy QazAqparat tilshisi.

«Ótken jyly Qazaqstanǵa Nıderland – 8,3 mlrd, AQSh – 5,1 mlrd, Shveıtsarııa – 2,8 mlrd, Belgııa – 1,6 mlrd, Reseı – 1,5 mlrd, Ońtústik Koreıa – 1,5 mlrd, Qytaı –1,4 mlrd, Frantsııa – 770 mln, Ulybrıtanııa – 661 mln jáne Germanııa – 470 mln dollar tikeleı ınvestıtsııa baǵyttady. Byltyr ınvestıtsııalardyń ártaraptandyrylýy boıynsha elderde oń qarqyn bar. Bul rette, Ońtústik Koreıa, Sıngapýr, Birikken Arab Ámirlikteri jáne Germanııa tarapynan baǵyttalǵan ınvestıtsııanyń kólemi óskeni baıqaldy», - dep 2022 jyldyń qorytyndylaryn shyǵardy Syrtqy ister mınıstriniń orynbasary.

Almas Aıdarov shetelden ınvestıtsııa tartý boıynsha Qazaqstan Ortalyq Azııada kósh bastap turǵanyna da toqtaldy. Onyń sózinshe, byltyr ınvestorlar elimizge 28 mlrd dollarǵa jýyq qarajat baǵyttaǵan.

Al, salalar bólinisinde eń kóp sheteldik ınvestıtsııa kólemi taý-ken óndirý ónerkásibine tartylǵan – 12,1 mlrd dollar.