Byltyr qaskóı ańshylar 300-den astam kıikti qyryp saldy
«Brokonerlikpen kúres boıynsha qabyldanyp jatqan sharalarǵa qaramastan, kıikterdi zańsyz atý azaıǵan joq. 2014 jyly Orman sharýashylyǵy jáne janýarlar dúnıesi komıteti men QR ІІM bókender mekendeıtin arealda kıikterdi atý, olardyń múıizderin satyp alý men tasymaldaý boıynsha 68 faktini tirkedi. Qaskóı ańshylar 300-den astam kıikti atyp alǵan, osy zań buzýshylardan 1015 bóken múıizi tárkilendi», delingen QazAqparatqa bergen málimette. Atap aıtqanda, bul faktiler elimizden tys jerlerge kıik múıizderin kontrabandalyq tasymaldaý múmkindigin baıqatyp otyr. Bul janýarlardyń múıizderi shyǵys medıtsınasynda dárilik zattyń shıkizaty retinde paıdalanatyny belgili. Sonymen qatar, kıikterdiń sanyn arttyrýǵa kedergi taǵy bir problema - ol janýarlardyń ınfektsııalarǵa sezimtaldyǵy. Esterińizge sala keteıik, 2010-2013 jyldary BQO, Qostanaı, Aqmola oblystarynda pasterellezden bókenderdiń jappaı qyrylýy anyqtaldy. Nátıjesinde 14 myńnan astam janýar qyryldy. Mınıstrliktiń málimetinshe, kıikterdiń derti jetkilikti deńgeıde zerttelmegen, sondyqtan bul jaǵdaı olardyń kóbeıýine naqty qater týdyryp otyr. Osy oraıda QR AShM Orman sharýashylyǵy jáne janýarlar dúnıesi komıteti men QR BǴM 2012 jyldan bastap kıikterdiń ınfektsııalyq indetterin zertteý boıynsha ǵylymı-tehnıkalyq baǵdarlamany júzege asyrýda. Bul baǵyttaǵy jumystar ınfektsııalyq dertterdiń aldyn alýǵa negizdelgen. Qazaqstanda kıikterdiń Betpaqdala taralymy, al ekinshisi Ústirt jáne Oral taralymdary mekendeıdi. QR AShM derekterine súıensek, HH ǵasyrdyń 90-jyldarda olardyń sany 1 mıllıonnan astamnan 2003 jyly 21 myń basqa deıin tómendeýinen bul janýarlardy saqtap qalý problemaǵa aınaldy. Vedomstvo málimetinshe, elimizde qabyldanǵan sharalardyń arqasynda sońǵy jyldary bókenderdiń sany artyp keledi. 2014 jyly olardyń basy 256,7 myńǵa jetken eken.