Byltyr kásiptik jáne tehnıkalyq bilim berý uıymdary 28 birlikke artty - Bilim jáne ǵylym mınıstri
/Qanat Mámetqazyuly/ - 2010 jyly tehnıkalyq jáne kásiptik bilim berý uıymdarynyń jelisi 28 birlikke artyp, olardyń sany 894-ti qurady. Búgin Úkimet basshysy Kárim Másimovtyń qatysýymen ótken Bilim jáne ǵylym mınıstrliginiń alqa májilisinde vedomstvo basshysy Baqytjan Jumaǵulov osylaı málim etti.
Mınıstrdiń aıtýynsha, byltyrǵy jyly kásiptik jáne tehnıkalyq bilim oshaqtaryna oqýshylardy qabyldaý 4,6 myńǵa artyp, olarda bilim alatyndar sany - 216,8 myńǵa jetken. Sonymen qatar 2010 jyly 7 myńǵa tarta ınjener-pedagog qyzmetker biliktiligin arttyrsa, olardyń 107-si shetelde shyńdalǵan. «Alaıda, mamandardy daıarlaý sapasy áli de óz deńgeıinde emes. Onyń bir sebebi - oqýshylardyń naqty praktıkamen jetkilikti qamtylmaýynda bolyp otyr. Bul júıeli tehnıkalyq bilimniń óndiristen qol úzýimen baılanysyp jatqan problema. Bul rette negizinen kásiptik tehnıkalyq ýchılışeler kóptegen elderdiń tájirıbesine saı iri kásiporyndardyń janynan qurylýy qajet», - dedi B. Jumaǵulov.
