Byltyr elordada kóshi-qon salasyna qatysty 635 myńnan astam qyzmet kórsetildi

ASTANA. QazAqparat – Byltyr Astanada kóshi-qon salasyna qatysty 635 myńnan astam memlekettik qyzmet kórsetildi. Bul týraly elordadaǵy Polıtsııa departamenti Kóshi-qon qyzmeti basqarmasy basshysynyń orynbasary Anar Jomartova aıtty, dep habarlaıdy QazAqparat tilshisi.

«Kóshi-qon qyzmeti basqarmasy bólimsheleri halyqqa 11 memlekettik qyzmet túrin kórsetedi, olardyń 85 paıyzy qazirgi ýaqytta avtomattandyrylǵan», - dedi A. Jomartova 2022 jyldaǵy kóshi-qon salasyndaǵy qorytyndy derekterge arnalǵan baspasóz máslıhatynda.

Osy oraıda ol 2022 jyly 635 myńnan astam memlekettik qyzmet kórsetilgenin aıtty. Onyń 356 myńy halyqqa qyzmet kórsetý ortalyqtary, 42 myńy Іshki ister mınıstrligi aqparattyq júıeleri arqyly oryndalsa, 16 myń qyzmet qaǵaz qujattar túrinde atqaryldy.

Sonymen birge, byltyr halyqqa qyzmet kórsetý ortalyqtarynda 243 myńǵa jýyq Qazaqstan azamatyna, Astanada turaqty turatyn 3 myń sheteldikke jeke basty kýálandyratyn qujattar resimdeldi.

«234 myń Qazaqstan azamaty turǵylyqty jeri boıynsha tirkelgen, onyń 219 myń 131-i turaqty, 14 myń 906-sy ýaqytsha», - dedi Polıtsııa departamenti Kóshi-qon qyzmeti basqarmasy basshysynyń orynbasary.

Onyń sózine qaraǵanda, 11 myń sheteldikke eńbek etýge ruqsat beretin qujat tapsyryldy. 8 myńǵa jýyq Qazaqstanǵa kelý vızasy, 6 myńnan astam elden shyǵý vızasy, sondaı-aq 195 myń jeke sáıkestendirý nómiri berildi.

Budan buryn habarlanǵandaı, 2022 jyly elordada ýaqytsha tirkelgen shetel azamattarynyń sany ósti.

Astanada kóshi-qon zańnamasyn buzǵan 6 myńǵa jýyq shetel azamaty anyqtaldy.