Byltyr elordada 4 myńnan astam erli-zaıypty ajyrasqan

ASTANA. QazAqparat – Elordada jas otbasylardy qoldaý jáne ajyrasýdyń aldyn alý boıynsha birneshe baǵyttan turatyn keshendi is-shara iske asyrylyp jatyr. Tolyǵyraq Astana qalasy jastar saıasaty máseleleri basqarmasynyń basshysy Qaırat Qambarov aıtyp berdi, dep habarlaıdy QazAqparat tilshisi.

«Ótken jyldyń qorytyndysy boıynsha elordada 10 669 jup nekesin qıǵan, al ajyrasqan juptar sany - 4 289. Jastar arasynda otbasylyq qundylyqtardy túsindirý, mádenıet, ulttyq dástúr men moraldyq qundylyqtar negizinde neke jáne otbasy ınstıtýtyn nyǵaıtý maqsatynda bizdiń basqarma «Otbasy - baqyt mekeni» atty aýqymdy is-sharalar keshenin júzege asyryp jatyr», - dedi Qaırat Qambarov Astana qalasynyń kommýnıkatsııalar qyzmetinde ótken baspasóz máslıhatynda.

Onyń aıtýynsha, 2022 jyly otbasylyq qundylyqtardy nasıhattaý baǵytynda 7 baǵytta keshendi shara qolǵa alynǵan.

«Jas otbasylarǵa arnap qarym-qatynastaǵy problemalar men daǵdarystar, ony sheshý joldary, durys tárbıe, psıhologııalyq travmadan qalaı aýlaq bolý joldary, tabysty tulǵany qalaı tárbıeleý kerek, ajyrasý jáne onyń áleýmettik-psıhologııalyq saldary taqyryptarynda semınar uıymdastyryldy. Onyń nátıjesinde semınar-trenıngterdiń belsendi qatysýshylaryna otbasylyq keshki as, fotosessııa jáne aspazdyq sheberlik sabaqtaryna sertıfıkat tabystaldy», - deıdi ol.

Basqarma basshysynyń málimdeýinshe, semınarǵa 30 jýyq erli-zaıypty qatysqan.

Semınarda art-terapevter, psıhologtar, qarjygerler jáne pedagog-psıhologtar spıker bolǵan.