Byltyr elordada 18 myń qylmys tirkeldi

NUR-SULTAN. QazAqparat – Byltyr elordada tirkelgen qylmystar sany 2018 jylmen salystyrǵanda 5720-ǵa azaıyp, 18 myńdy qurady. Bul týraly búgin Nur-Sultan qalasy Polıtsııa departamentiniń basshysy Erjan Sádenov halyqqa esep berý kezinde aıtty, dep habarlaıdy QazAqparat.

Polıtsııa departamentiniń basshysy baıandamasyn ótken jylǵy jedel-qyzmet jumystaryn qorytyndylaýdan bastady.

«2019 jyly 2018 jylmen salystyrǵanda qylmys sany 5720-ǵa, ıaǵnı 24 myńnan 18 myńǵa tómendedi. Adam óltirý, densaýlyqqa aýyr zııan keltirý, qaraqshylyq, tonaý, urlaý, buzaqylyqqa qatysty qylmystar azaıdy. Qoǵamdyq ortalarda jasalatyn qylmys 38,6%, kóshede jasalatyn qylmys 45,4%, jasóspirimder arasyndaǵy qylmys 10,7% tómendedi», - deıdi Erjan Sádenov.

Sondaı-aq ol departament basshylyǵy apta saıyn azamattardy qabyldap, máselelerin sheshý úshin naqty sharalar qabyldap jatqanyn atap ótti.

«Sonymen qatar, byltyr qala turǵyndaryna 1 mln 300 myń qyzmet túri kórsetildi. Olar: azamattardy turǵylyqty jerleri boıynsha tirkeý, jeke kýálikti, tólqujatty, mekenjaı anyqtamasyn rásimdeý jáne taǵy basqa qyzmet túrleri», - dedi ol.