Byltyr elimizdiń medıtsınalyq uıymdary telemedıtsına aıasynda 15 myńǵa jýyq konsýltatsııa ótkizdi
ASTANA. 11 qańtar. QazAqparat - 2012 jyldyń qorytyndysy boıynsha elimizdiń medıtsınalyq uıymdary telemedıtsına aıasynda 14 902 konsýltatsııa men 4 821 beınekonferentsııa ótkizdi.
Bul aqparatty Densaýlyq saqtaýdy damytý respýblıkalyq ortalyǵynyń baspasóz qyzmetinen habarlady.
Sonymen qatar mekemeniń atap ótýinshe, telemedıtsına aıasynda sheteldik klınıkalarmen 33 konsýltatsııa, 270 keńes pen semınar uıymdastyryldy. Telemedıtsınalyq konsýltatsııa qyzmetine Qaraǵandy, Ońtústik Qazaqstan jáne Batys Qazaqstan oblystary barynsha kóp júgindi. Júrgizilgen saraptamalarǵa qaraǵanda, kardıologııa (5756 konsýltatsııa), pýlmonologııa (1882) jáne nevropotologııa (1044) syndy mamandardan keńes alýǵa nıet tanytatyndardyń qarasy mol.
Aıta keteıik, qazirgi ýaqytta elimizdiń Ulttyq telemedıtsınalyq jelisi oblystyq, aýdandyq aýrýhanalarda, respýblıkalyq klınıkalarda, medıtsınalyq JOO-larda, densaýlyq saqtaý basqarmalarynda ornalasqan 186 telemedıtsınalyq ortalyqtyń basyn qosady.
