Byltyr elimizdegi óndiris nysandarynda 28 oqys oqıǵa tirkeldi
Byltyrǵy oqys oqıǵalar kezinde 24 adam zardap shekken, onyń ishinde 11 adam qaza tapsa, 7 adam aýyr, 6 adam jeńil dárejede jaraqat alǵan.
Komıtettiń málimdeýinshe, barlyq apattar egjeı-tegjeıli tergelip, tıisti sharalar qabyldandy.
áOqys oqıǵalar kómir, taý-ken, metallýrgııa, munaı-hımııa, munaı-gaz óndirý, jarylys jumystaryn júrgizetin obektilerde, qazandyq jáne gaz sharýashylyqtarynda, kótergish qurylystarda oryn alǵan.
Tekserý aktilerine sáıkes jazataıym oqıǵalardyń negizgi sebebi eskirgen, moraldyq jáne fızıkalyq turǵydan tozǵan, qyzmettiń normatıvtik merzimin ótegen jabdyqtardy paıdalanýdan», delingen habarlamada.
Osy máseleni sheshý úshin QR IIDM Indýstrııalyq damý jáne ónerkásiptik qaýipsizdik komıtetiniń bastamasy boıynsha kásiporyndarmen birlesip jyl saıyn tehnıkalyq qaıta jaraqtandyrýdyń jıyntyq jospary ázirlendi, qazirgi ýaqytta 1 424 tehnıkalyq qurylǵy men 66 tehnologııalyq jeli aýystyryldy.
Mamandardyń málimeti boıynsha, tirkelgen oqys oqıǵalardyń kelesi sebebi –ónerkásiptik qaýipsizdik talaby men erejesin buzý. Úshinshiden, óndiristik baqylaýdyń tómen bolýy, ıa bolmasa tipti júrgizilmeýi jáne qyzmetkerlerdiń biliktiliginiń tómendigi.
«Osyǵan baılanysty ónerkásiptik qaýipsizdik salasyndaǵy normatıvtik quqyqtyq bazany odan ári jetildirý maqsatynda Qazaqstan Respýblıkasy Úkimetiniń 2019 jylǵa arnalǵan zań jobalaý qyzmeti sheńberinde ónerkásiptik qaýipsizdik máseleleri jónindegi zań jobasy ázirlendi jáne Májilisine engizildi.
Zań jobasy ónerkásiptik qaýipsizdik salasyndaǵy zańnama normalaryn jetildirýge jáne memlekettik qadaǵalaýdy júzege asyrýdyń tıimdiligin arttyrýǵa baǵyttalǵan», delingen habarlamada.
Budan bólek, komıtet qyzmetkerleri munaı jáne gaz salalarynyń qaýipti óndiris obektileri úshin ónerkásiptik qaýipsizdikti qamtamasyz etý erejelerin qaıta qarady. Sondaı-aq qazirgi zamanǵy normalarǵa jáne halyqaralyq tehnologııalyq talaptarǵa sáıkes atalǵan normatıvtik quqyqtyq aktilerdi jan-jaqty qaraý jáne olarǵa ózgerister engizý josparlanǵan.
Indýstrııalyq damý jáne ónerkásiptik qaýipsizdik komıteti 221 myńnan astam qaýipti óndiristik obektilerdi qamtıtyn 9 myńǵa jýyq kásiporynda ónerkásiptik qaýipsizdik salasynda memlekettik qadaǵalaýdy júzege asyrady. Negizinen bul kenishter men kómir shahtalary, karerler, metallýrgııalyq, hımııalyq jáne munaı óńdeý zaýyttary, magıstraldy qubyrlardyń atom ónerkásibi obektileri jáne basqalar.
«2019 jyly óndiris oshaqtarynda 1447 tekserý júrgizildi. Tekserý qorytyndysy boıynsha barlyǵy 50 193 zań buzýshylyq anyqtaldy. 168 mln teńgeden astam qarjyǵa 1 885 aıyppul salyndy, onyń 1 422-si zańdy tulǵaǵa jáne 463-i jeke tulǵaǵa», delingen habarlamada.
