Byltyr elimizde jumys isteýge 36 myńnan astam sheteldik azamatqa ruqsat berildi
ASTANA. QazAqparat - 2016 jyly jergilikti atqarýshy organdar tarapy Qazaqstan Respýblıkasynyń aýmaǵynda eńbek qyzmetin júzege asyrý úshin sheteldik jumys kúshin (ári qaraı - ShJK) tartý maqsatynda 36 792 ruqsat bergen, dep habarlaıdy primeminister.kz .
Olardyń ishinde birinshi sanatqa jatatyny 2 076 bolsa (basshylar men olardyń orynbasarlary), ekinshi sanatqa 7 043 tıesili bolyp otyr (qurylymdyq bólimshelerdiń basshylary). ShJK tartýǵa ruqsattyń negizgi bóligi úshinshi - mamandar 16 811 adam jáne tórtinshi - biliktilikke ıe jumysshylar 8 542 adam sanattary boıynsha jasalǵan.
Ótken jyly, sheteldik jumys kúshin shaqyrǵan 3 768 jumys berýshide, 470 398 qazaqstandyq azamat jumys istep, bul eńbekkerlerdiń jalpy sanynyń 94 paıyzyn quraǵan.
Eńbek mıgranttary kelgen elderdiń ishinde eń aldymen Qytaı (12 myń 699 adam), Túrkııa (3 myń 502 adam), Ózbekstan (1 myń 564 adam), Ulybrıtanııa (1 myń 474 adam) jáne Úndistan (1 myń 388 adam) memleketteri kózge túsedi.
Osy oraıda atap óterligi, 2016 jyly shetelden jumys kúshin tartqan jumys berýshilerde Qazaqstan azamattaryna 16 259 jumys orny qurylyp, kásibı daıyndyq pen qaıta daıarlyqtan 1 340 qazaqstandyq azamat ótken. Sonymen qatar, 5 427 jergilikti jumysshy men 11 sheteldik mamannyń ornyn qazaqstandyq kadrlar basqan.
Eske salsaq, 2017 jyldyń 1 qańtarynan Qazaqstanda sheteldik jumys kúshin tartýdyń jańa jeńildetilgen tártibi engizildi. Buǵan sáıkes, jumys ruqsattaryn berý merzimi qysqartylyp, jumys berýshilerge qatysty ákimshilik talaptar alynyp tastaldy.
Atalǵan sharttardan bosaǵan jumys berýshiler endi salyq alymdaryn tóleýi tıis. Salyq kólemi sheteldik jumys kúshiniń sanaty men sala sıpatyna qaraı 137-250 AEK arasynda belgilenbek, ıaǵnı 290 - 530 myń teńge sheginde.
