Byltyr elimizde jetim balalarǵa arnalǵan ınternattyń 14-i jabyldy
ASTANA. 25 maýsym. QazAqparat - Qazaqstanda jetim balalarǵa arnalǵan ınternattar sany azaıý ústinde.
Búgin Parlament Májilisiniń Áleýmettik-mádenı damý komıtetiniń keńeıtilgen otyrysy barysynda Densaýlyq saqtaý mınıstrligi balalar quqyn qorǵaý komıtetiniń tóraıymy Raısa Sher osylaı málim etti. Eske salsaq, komıtet otyrysynda «Qıyn ómir jaǵdaıyndaǵy balalar men jastar úshin arnaýly áleýmettik qyzmetterdi usyný júıesin ózgertý úshin jaǵdaılar jasaý» máselesi talqylanǵan edi.
«Árıne, qashanda, qaı qoǵamda da ata-anasynyń qamqorlyǵynsyz qalǵan jetim balalar boldy, áli de bola beretinin joqqa shyǵara almaımyz. Balalar tastandy atanǵanda memleket olardy óz qamqorlyǵyna alady. Álbette, ázirshe balalar úıinen tolyǵymen bas tarta almasymyz anyq. Degenmen, belgili bir sharalardyń arqasynda úlken balalar úıin aýystyrý nemese balalar úıleriniń tárbıelenýshilerin otbasyna berý múmkindigin arttyra túsýde nátıje barshylyq. Máselen, ótken jyly úkimettik emes sektordyń qoldaýymen jetim balalarǵa arnalǵan 14 ınternat uıymy jabyldy», - deıdi R. Sher.
Onyń aıtýynsha, aǵymdaǵy jyly da mundaı 10 uıymdy jabý kózdeledi. Bul úshin ákimdiktermen arnaıy jumystar atqarylýda.
