Byltyr elimizde jan basyna shaqqandaǵy JІÓ 12 myń 100 dollardy qurady - Úkimet basshysy
ASTANA. 23 qańtar. QazAqparat - 2012 jyly jan basyna shaqqandaǵy jalpy ishki ónimniń mólsheri aldyn ala baǵalaý boıynsha 12 100 AQSh dollaryn qurady.
Bul týraly búgin Aqordada Memleket basshysynyń qatysýymen ótip jatqan 2012 jyldyń qorytyndylary men «Qazaqstan-2050» strategııasyn júzege asyrý mindetteri boıynsha ótken Úkimet otyrysynda QR Premer-Mınıstri Serik Ahmetov málim etti.
Úkimet basshysynyń aıtýynsha, byltyrǵy jyldyń qorytyndysyna sáıkes, Ulttyq qor aktıvteri ótken jyly shamamen 32 paıyzǵa ósip, 57, 8 mlrd. dollarǵa jetken. «Ótken jyly elimizge syrttan keletin ınvestıtsııa kólemi de artty, eksporttyq baǵalaý boıynsha shamamen 20 mlrd. dollar shetel ınvestıtsııasy tartyldy», - dedi Premer-Mınıstr.
