Byltyr elimizde negizgi kapıtalǵa salynǵan ınvestıtsııalar kólemi 6 trln. 574,7 mlrd. teńgeni quraǵan
ASTANA. QazAqparat - 2014 jylǵy qańtar-jeltoqsan aralyǵynda negizgi kapıtalǵa salynǵan ınvestıtsııalar kólemi 6 trln. 574,7 mlrd. teńgeni qurap, atalǵan kórsetkish 2013 jylǵy qańtar-jeltoqsanǵa qaraǵanda 3,9 paıyzǵa artty. Bul týraly Ulttyq ekonomıka mınıstrliginiń baspasóz qyzmetinen habarlandy.
Mınıstrliktiń málimetine qaraǵanda, qysqa merzimdi ekonomıkalyq ındıkator 2014 jylǵy qańtar-jeltoqsanda 2013 jylǵy qańtar-jeltoqsanǵa qaraǵanda 102,8 paıyz qurady. Sonymen qatar, 2014 jylǵy qańtar-jeltoqsanda ónerkásip óndirisiniń kólemi 18 trln. 492,8 mlrd. teńgege jetken. Bul rette ken óndirý ónerkásibinde jáne karerlerdi qazýda óndiris kólemi - 0,3 paıyz, sýmen jabdyqtaýda, káriz júıesi, qaldyqtardy jınaý jáne bólýdi baqylaýda 5,5 paıyzǵa tómendegen. Al óńdeý ónerkásibinde - 1 paıyz, elektrmen jabdyqtaý, gaz, bý berý jáne aýa baptaýda 2,3 paıyzǵa artty.
Budan bólek, 2014 jylǵy qańtar-jeltoqsan aralyǵynda aýyl sharýashylyǵy jalpy óniminiń kólemi 2 trln. 509,9 mlrd. teńgeni qurap, kórsetkish 2013 jylǵy qańtar-jeltoqsanǵa qaraǵanda 0,8 paıyzǵa artty. Esepti kezeńde kólik salasy boıynsha naqty kólem ındeksi 107 paıyzdy qurdy. Sonymen qatar, 2014 jylǵy qańtar-jeltoqsanda júk aınalymynyń kólemi 487,4 mlrd. tonna-shaqyrym (kommertsııalyq júk tasymaldaýmen aınalysatyn jeke kásipkerlerdiń júk aınalymy kóleminiń baǵalaýy esebimen) qurap, 2013 jylǵy qańtar-jeltoqsanmen salystyrǵanda 1,2% kemidi. Jolaýshylar aınalymynyń kólemi 249,6 mlrd. jolaýshy-shaqyrymdy qurap, 6,8 artqan.
Sondaı-aq, esepti kezeńde «baılanys» salasy boıynsha naqty kólem ındeksi 108,5 paıyz qurasa, «saýda» salasy boıynsha naqty kólem ındeksi 109 paıyz boldy. Al qańtar-jeltoqsanda bólshek saýda kólemi (qoǵamdyq tamaqtandyrý aınalymyn qospaǵanda) 6 trln. 20,8 mlrd. teńgeni qurap, 2013 jylǵy qańtar-jeltoqsanmen salystyrǵanda 12,1 paıyzǵa ósken.
