Byltyr elimizde et, sút pen jumyrtqa óndirisi aıtarlyqtaı ósti - AShM

ASTANA. QazAqparat - Qazaqstannyń agroqurylymdarynda 2013 jyly et, sút, jumyrtqa óndirisi aıtarlyqtaı ósimge ıe boldy. Bul týraly búgin Aýyl sharýashylyǵy mınıstri Asyljan Mamytbekovtyń jetekshiligimen ótken alqa otyrysynda Aýyl sharýashylyǵy ónimderin óndirý jáne óńdeý departamenti basshysynyń mindetin atqarýshy Erkebulan Ahmetov málim etti.

Departament basshysynyń aıtýynsha, 2013 jyly elimizde et óndirisi 871 myń tonnaǵa jetken. Bul 2012 jylǵy kórsetkishpen salystyrǵanda 3 paıyzǵa joǵary. «Sonymen qatar, sút óndirisi 1,6 paıyzǵa artyp otyr. Al agroqurylymdardaǵy ónim óndirisi aıtarlyqtaı nátıjege qol jetkizdi, máselen, olarda et óndirisi 13 paıyzǵa, sút 12 paıyz, jumyrtqa 10 paıyzǵa jetip otyr», - deıdi E.Ahmetov. Onyń sózine qaraǵanda, 2014 jyldyń 1 maýsymyndaǵy jaǵdaıǵa sáıkes, mal sharýashylyǵy óndirisiniń negizgi túrlerinde ósim baıqalýda. Atap aıtqanda, jalpy et óndirisindegi óńdelgen ónim úlesi 30 paıyzǵa jetse, súttiń óńdelgen úlesi 41 paıyzdy quraǵan. Bul rette et pen súttiń óńdelgen ónimderi boıynsha joǵary úlesi Almaty, Batys Qazaqstan, Shyǵys Qazaqstan oblystaryna tıesili bolyp otyr.