Byltyr elimizde 2 mln. astam ákimshilik quqyq buzýshylyq oryn alǵan - E.Turǵymbaev
ASTANA. QazAqparat - 2013 jyly elimizde 2 mln. 767 myńnan astam ákimshilik quqyq buzýshylyq oryn aldy. Bul týraly búgin Parlament Senatynda «Ákimshilik zańnamany reformalaý: problemalar men jetildirý baǵyttary» taqyrybynda ótken konferentsııada QR Іshki ister mınıstriniń orynbasary Erlan Turǵymbaev málim etti.
ІІM orynbasarynyń aıtýynsha, byltyr elimizde anyqtalǵan ákimshilik quqyq buzýshylyqtyń 2 mln. 187 myńyna aıyppul salynyp, onyń mólsheri 17 mlrd. teńgeden asty. Munyń shamamen 10 mlrd. teńgesi nemese 59 paıyzy bıýdjetke óndirip alynǵan.
«Jalpy, anyqtalatyn ákimshilik quqyq buzýshylyqtardyń 84 paıyzy ishki ister organdaryna tıesili», - deıdi Erlan Turǵymbaev.
Budan bólek, mınıstrdiń orynbasary jalpy alǵanda ákimshilik quqyq buzýshylyq áreketterdi qylmystyq sanatqa almastyrý jalpy qylmysqa qatysty profılaktıkaǵa teris áser etetinin atap ótti. Erlan Turǵymbaevtyń sózine qaraǵanda, bul túrmedegilerdiń sanynyń artýyna yqpal etpek.
«Ákimshilik qylmystyq áreketterdiń keıbirin qylmystyq áreketterge aýystyrý túrme halqyn avtomatty túrde 2 esege arttyrady. Sondyqtan biz ákimshilik kodekstiń jobasyna ákimshilik qamaýǵa alýdy ákimshilik jazalaý sharasy retinde qarastyrýdy, sonymen birge birqatar qylmystyq áreketterdi ákimshilik quqyq buzýshylyqqa jatqyzý týraly máseleni qaıta qaraýdy usynamyz», - deıdi Erlan Turǵymbaev.
