Byltyr elimizde 2,5 mln gektar jer memleketke erikti túrde qaıtarylǵan - AShM

ASTANA. QazAqparat - Sońǵy jyldary elimizdegi agroónerkásiptik keshen sýbektilerine salyq salý júıesi jetildirildi. Osynyń nátıjesinde 2015 jyly 2,5 mln. gektar jer memelketke erikti túrde qaıtaryldy. Bul týraly búgin Parlament Senatynda ótken parlamenttik tyńdaý barysynda QR Aýyl sharýashylyǵy mınıstri Asyljan Mamytbekov málim etti.

Mınıstrdiń aıtýynsha, arnaıy salyq rejımindegi aýyl sharýashylyǵy maqsatyndaǵy jerlerge salyq salýdyń jetildirilmeýi problemasy sońǵy jyldary ońtaıly sheshimin taýyp keledi. Máselen, osy problemany sheshý maqsatynda jer salyǵynan 70 paıyzdyq jeńildik alynyp tastalyp, ol boıynsha mólsherleme 5 esege ulǵaıǵan.

«Bul rette biryńǵaı jer salyǵy boıynsha mólsherleme 1,5 esege ulǵaıtylyp, óńirlerge ony qoldanylmaıtyn jerler boıynsha 10 esege deıin ulǵaıtý quqyǵy berildi. Nátıjesinde, 2015 jyly 2,5 mln. gektar jer erikti túrde memelket ıeligine qaıtaryldy. Onyń ishinde 400 myń gektar egistik jáne 1,8 mln. gektar jaıylymdyq jerler», - dedi vedomstvo basshysy.

Budan bólek, mınıstr jalpyǵa ortaq salyq salý rejımi qoldanylatyn aýyl sharýashylyǵy taýaryn óndirýshi zańdy tulǵalar men sharýa (fermer) qojalyqtaryna ósip ketken salyqtyq júktemeni teńestirý sharasy qabyldanǵanyn atap ótti. Bul úshin eńbekaqy qory boıynsha qosarlanǵan shegerim júrgizý, áleýmettik salyq mólsherlemesin 6,5 paıyzǵa deıin tómendetý, qosylǵan qun salyǵyn tóleý kezinde 70 paıyzdyq jeńildik alý jáne múlik, kólik salyǵyn tóleýden bosatylý quqyǵy berilgen.

«Sonymen qatar, barlyq sharýa (fermer) qojalyqtary úshin qorshaǵan ortaǵa emıssııa úshin aqy tóleý biryńǵaı jer salyǵy quramyna qosyldy», - dep atap ótti mınıstr.