Byltyr elimizde 15,4 mln sharshy metr turǵyn úı paıdalanýǵa berildi

ASTANA. QazAqparat – Ótken jyly Qazaqstanda 15,4 mln sharshy metr baspana qoldanysqa berildi. Bul týraly Indýstrııa jáne ınfraqurylymdyq damý mınıstri Marat Qarabaev málim etti, dep habarlaıdy QazAqparat tilshisi.

Mınıstrdiń baıandaýynsha, ótken jyldyń qorytyndysy boıynsha jalpy qurylys kóleminiń ındeksi 109,4% qurady. Qurylys salýda Mańǵystaý (78,7%) jáne Qaraǵandy (94,4%) oblysyn qospaǵanda, 18 óńirde oń dınamıka baıqalady.

«Ótken jyldyń jospary boıynsha 15,1 mln sharshy metr turǵyn úı paıdalanýǵa berilýi tıis edi. Jospar artyǵymen oryndalyp 15,4 mln sharshy metr turǵyn úı ıesin tapty. Osylaısha respýblıka boıynsha barlyǵy 130 686 turǵyn úı paıdalanýǵa berildi. Onyń ishinde 38 247 jeke úı. Ótken jyly turǵyn úıdi paıdalanýǵa berý kórsetkishi 2021 jylmen salystyrǵanda Mańǵystaý (84,9%), Atyraý (92,2%), Ulytaý (70,4%), SQO (86,9%) jáne Almaty (65,4%) men Astana (75,3%) qalasyn qospaǵanda, 14 óńirde ósý kórsetkishi baıqalady», - dedi Marat Qarabaev Úkimet otyrysynda.

Buǵan deıin ındýstrııa jáne ınfraqurylymdyq damý mınıstri ótken jyly 2 trln teńgege 160-qa jýyq ınvestıtsııalyq jobanyń iske qosylǵany týraly aıtqan edi.