Byltyr elimizde 13 teatr men kınoteatr, 46 mádenıet úıi qaıta jańǵyrtyldy - Elbasy
ASTANA. Naýryzdyń 19-y. QazAqparat /Ernur Aqanbaı/ - Dúnıe júzilik daǵdarys jaǵdaıynda, tek ótken jyly ǵana elimizde 13 teatr men kınoteatr, 66 kitaphana, 28 murajaı, 46 mádenıet úıi qaıta jańǵyrtyldy. Bul týraly búgin Astanada «Naýryz nury» merekelik keshinde Elbasy Nursultan Nazarbaev aıtty,
dep habarlaıdy QazAqparat.
Elbasy keshe ǵana Shymkent qalasynda oblystyq fılarmonııanyń ásem ǵımaraty boı kótergenin, al Astanadaǵy 3 500 oryndyq zamanaýı «Qazaqstan» ortalyq kontsert zaly bul óńirde teńdesi joq biregeı ǵımarat ekenin atap kórsetti.
«Biz tarıh úshin qas-qaǵym ýaqytta irgesi berik memleket qurdyq. Búkil álemdi tańqaldyrǵan ásem elordamyz - Astana qalasyn saldyq. Qıyn kezeńderge qaramastan ultymyzdyń mádenıetin damytýǵa erekshe kóńil bóldik. «Mádenı mura» baǵdarlamasy aıasynda qyrýar sharýa atqaryldy. Dál osy jyldarda Almatydaǵy opera jáne balet teatry, akademııalyq qazaq jáne orys drama teatrlary, uıǵyr, koreı ulttyq teatrlary kúrdeli jóndeýden ótkizildi. Oblystyq deńgeıdegi 11 teatr ashylyp, kóptegen talantty jastar sahnaǵa shyǵýǵa múmkindik aldy», dedi saltanatty keshte N. Nazarbaev.
