Byltyr el sportshylary álem chempıonattarynda olımpıadalyq sport túrlerinen 11 medal aldy - T. Dosmuhambetov
ANA. 28 naýryz. QazAqparat /Qanat Mámetqazyuly/ - Byltyrǵy jyly elimizdiń sportshylary álem chempıonattarynda olımpıadalyq sport túrleri boıynsha 11 medalǵa, olımpıadalyq emes túrleri boıynsha 81 medalǵa, al basqa da týrnırler boıynsha 334 medalǵa qol jetkizgen.
Bul týraly búgin QR Parlamenti Májilisinde ótken Úkimet saǵatynda Týrızm jáne sport mınıstri Temirhan Dosmuhambetov málim etti.
«Sonymen qatar, Vankýverde ótken qysqy Olımpıada oıyndarynda elimizdiń ulttyq qurama komandasy 12 jyldyq úzilisten keıin alǵash ret kúmis medaldy qanjyǵamyzǵa baılady. Osyǵan oraı, álemniń myqty sportshylarynyń ondyǵyna 7 qazaqstandyq atlet enip otyr. Al byltyrǵy Gýanchjoýdaǵy (Qytaı) 16-jazǵy Azııa oıyndarynda qazaqstandyq sprtshylar 18 altyn, 23 kúmis jáne 38 qola medalǵa qol jetkizip, olımpıadalyq sport túrlerindegi medaldardyń jalpy sany boıynsha 4-oryndy ıelendi», - dedi T. Dosmuhambetov. Budan bólek, mınıstr jas qazaqstandyqtardyń byltyrǵy Sıngapýrdaǵy birinshi jazǵy Jasóspirimder Olımpıada oıyndarynda da tabysty óner kórsetkenin alǵa tartty. Qazaqstandyq jas sportshylar osy dodada 2 altyn, 2 kúmis, 2 qola medal alyp, 204 qatysýshy eldiń arasynda 24-orynǵa taban tiregen.
