Byltyr densaýlyq saqtaý salasyna 37 mlrd teńge jumyldyryldy - ShQO

ÓSKEMEN. QazAqparat – Shyǵys Qazaqstan oblysynda medıtsınalyq mekemelerdiń materıaldyq-tehnıkalyq bazasyn nyǵaıtýǵa erekshe kóńil bólindi, dep habarlaıdy QazAqparat tilshisi.

Oblys ákimi Danıal Ahmetov halyq aldynda esep berý barysynda 8,3 mlrd teńgege qosymsha 174 ÓJJ apparaty, 10 rentgen-apparaty, 3 EKMO, 3 kompıýterlik tomograf jáne zamanaýı jabdyqtarmen jabdyqtalǵan 216 jedel járdem kóliginiń satyp alynǵanyn aıtty. Sonymen qatar qomaqty qarajat densaýlyq saqtaý nysandaryn jóndeýge jáne olardyń qurylysyna da bólingen. Jalpy ótken jyly óńirdiń densaýlyq saqtaý salasyna 37,3 mlrd teńge jumyldyryldy.

«Qazirgi tańda koronavırýs juqtyrǵandarǵa ýaqtyly jáne sapaly medıtsınalyq kómek kórsetý maqsatynda 41 ınfektsııalyq statsıonar jumys istep tur. Tolyqtaı jabdyqtalǵan 6 300 tósek-oryn uıymdastyrylǵan. Alǵashqy vırýs juqtyrý faktisi tirkelgen sátten bastap birinshi statsıonarlardaǵy tósek-oryn sany 12 esege artty», - dedi aımaq basshysy.

Halyqty PTR-zertteýlermen qamtýdy ulǵaıtý úshin oblysta táýligine jalpy qýaty 16 myń synamany quraıtyn 22 zerthana bar. Sondaı-aq ımmýndyq plazmany daıyndaý boıynsha kúrdeli jumystar júrgizilýde. Donorlyqqa 7 myń adam tartylyp, ártúrli qan toptarynyń 4 myń dozasy daıyndaldy. Onyń 1000-nan astam dozasy karonavırýsqa shaldyqqan patsıentterge quıyldy.

«Pandemııamen kúreske qaramastan, jetekshi sheteldik klınıkalarda mamandardy oqytý jalǵasýda. Ótken jyly álemdik deńgeıdegi 5 sheberlik-saǵaty ótkizilip, ıadrolyq medıtsına ortalyǵynyń, Altaı men Aıagóz ınsýlt ortalyqtarynyń, ana men bala ortalyǵy janyndaǵy ońaltý bólimshesiniń dárigerleri óz biliktilikterin arttyrdy. Jobany iske asyrý bastalǵannan beri 5,5 myńnan astam maman oqytyldy», - dedi Danıal Ahmetov.