Byltyr da osylaı jazalanǵan: SQO-da 9 mamyrda kóligine japsyrma japsyryp júrgen adam sottaldy

PETROPAVL. QazAqparat – Soltústik Qazaqstan oblysynda polıtseılerge baǵynbaı, kóligindegi japsyrmany sheshpegen er adam sottaldy, dep habarlaıdy QazAqparat tilshisi.

Petropavl qalasynyń ákimshilik quqyq buzýshylyq jónindegi mamandandyrylǵan soty 12 mamyrda Qazaqstan Respýblıkasy ÁQBtK-niń 667-babynyń 2-bóligine sáıkes - bir jyl ishinde qaıta quqyq qorǵaý organy qyzmetkeriniń zańdy ókimine nemese talabyna baǵynbaý boıynsha K.-ǵa qatysty ákimshilik quqyq buzýshylyq týraly isti qarap, sot ony kináli dep tanydy. Er adam 20 táýlikke ákimshilik qamaqqa alý túrindegi ákimshilik jazaǵa tartyldy.

9 mamyr kúni saǵat 12.45-te Petropavldaǵy «Zapadnyı» baqylaý-ótkizý beketiniń mańynda Mamlıýtskoe tas jolynyń boıynda K.-ny avtopatrýl toqtatqan. Odan polıtsııa qyzmetkeri qozǵalys kezinde kóriniske kedergi keltirýine baılanysty, avtokóliginiń aldyńǵy búıir terezelerine japsyrylǵan juldyz jáne ushaq sýretterin sheshýdi talap etken. Alaıda júrgizýshi quqyq qorǵaý organy qyzmetkeriniń zańdy talabyn oryndamaǵan.

Osydan bir jyl buryn, 2022 jyldyń 9 mamyrynda K. dál osylaısha polıtseılerdiń talabyn oryndamaı ákimshilik jaýapkershilikke tartylyp, oǵan ákimshilik qamaqqa alý túrinde jaza sharasy qoldanylǵan.

QR ÁQBtK-niń 667-babynyń 2-bóliginiń sanktsııasynyń balamasy joq jáne 15 táýlikten 20 táýlikke deıingi merzimge ákimshilik qamaqqa alýdy kózdeıdi.

Sot qaýlysy zańdy kúshine engen joq.