Byltyr BQO bıýdjetine 249 mlrd teńge túsken

ORAL. QazAqparat - Batys Qazaqstan oblysynda 2017 jyly memlekettik bıýdjetke 249 mlrd teńge túsim tústi, dep habarlaıdy «QazAqparat» tilshisi.

BQO memlekettik kirister departamenti basshysynyń orynbasary Baýyrjan Qaıdarovtyń óńirlik kommýnıkatsııalar qyzmeti alańynda málim etkenindeı, sonyń ishinde 175 mlrd teńge respýblıkalyq, 74 mlrd teńge jergilikti bıýdjetke aýdaryldy. 2016 jylmen salystyrǵanda, salyq túsimderi respýblıkalyq bıýdjetke 10 mlrd teńgege, jergilikti qazynaǵa 3,5 mlrd teńgege artyq túsken.

Oǵan qosa Ulttyq qorǵa 2017 jyly 178 mlrd teńge salyq túsiminiń túsýi josparlansa, ol 266 mlrd teńge bolyp, 107 paıyzǵa oryndaldy. Bul 2016 jylǵydan (120 mlrd teńge) 146 mlrd teńgege artyq.

Ótken jyly qosymsha 12 mlrd teńge salyq túsimderi anyqtalyp, bıýdjetke óndirildi. Sonymen qatar 760 mln teńge salyq bereshegi óndirildi.

2018 jyldyń 1 qańtaryndaǵy málimetke sáıkes salyq bereshegi 3,6 mlrd teńgeni qurap, ótken jyl basymen salystyrǵanda, 17,3 paıyzǵa azaıdy.

Departament basshysynyń keden salasy boıynsha orynbasary Nurbolat Abdýlovtyń sózine qaraǵanda, kedendik túsimder boljamy 19 730,6 mln bolsa, naqty túsim 19 924,4 teńgege jetip, jospar 101 paıyzǵa oryndaldy. Oblystyń syrtqy saýda taýar aınalymy 4 792,2 mln AQSh dollaryn qurasa, onyń 93,6 paıyzy (4483,5 mln dollar) - eksport, 6,4 paıyzy (308,7 mln dollar) - ımport.

Departament basshysynyń ekonomıkalyq tergeýler qyzmeti salasy boıynsha orynbasary Temirlan Shońaev 2017 jyly óndiriste 245 qylmystyq is, 230 quqyqbuzýshylyq tirkelgenin jetkizdi. Aıaqtalǵan qylmystyq ister boıynsha keltirilgen shyǵyn kólemi 1 mlrd teńgege jýyq, sonyń ishinde tárkileýdi qosa alǵanda, 517 mln teńge óndirildi.