Byltyr azyq-túlik ımporty 4 mlrd. dollardan asty
ASTANA. QazAqparat - Byltyrǵy jyly elimizde azyq-túlik ımportynyń kórsetkishi 4 mlrd. dollardan asty. Búgin Májilistegi Úkimet saǵatynda QR Statıstıka agenttiginiń tóraǵasy Álıhan Smaıylov osylaı málim etti.
Jıyn barysynda depýtat Shavhat Ótemisov agenttik basshysynan elimizdegi qazirgi ýaqytta azyq-túlik ımportynyń ahýalyna toqtalýdy, soǵan oraı ımporttyń ishki tutynýdaǵy úlesiniń serpinin suraǵan bolatyn.
Óz kezeginde agenttik tóraǵasy byltyrǵy jyldyń qorytyndysy boıynsha azyq-túlik ımportynyń kólemi tórt mıllıard dollardan sál asqanyn atap ótti. «Bul kórsetkish 2012 jylmen salystyrǵanda 5 paıyzǵa artyq. Aıta keterligi 2012 jyly da osy kórsetkish aldyńǵy jylmen salystyrǵanda bes paıyzǵa artqan edi. Osylaısha, elimizdiń ishki naryǵynyń tutynýdaǵy azyq-túlik ımportynyń úlesi 21,4 paıyzdan 21,6 paıyzǵa ósti. Alaıda, aıyrbas baǵamyn túzetý nátıjesinde, azyq-túlik ımportynyń úlesi tómendeıdi dep oılaımyn», dedi Á. Smaıylov.
