Byltyr azyq-túlik baǵasy 5,3 paıyzǵa qymbattady - Á. Smaıylov

Depýtattardyń saýalyna jaýap bere kele, agenttik tóraǵasy ınflıatsııaǵa oraı azyq-túlik tutyný taýarlarynyń barlyǵynyń baǵasy eskerilgenin jetkizdi. «Ótken jyly azyq-túlik taýarlarynyń baǵalary 5,3 paıyzǵa qymbattady. Atap aıtqanda, qyryqqabat, temeki ónimderi, shoshqa eti, qoı eti, jylqy eti, sıyr eti, un baǵalary ósti. Degenmen, keıbir ónimderdiń baǵasy arzandady. Mysaly, qaraqumyq jarmasy, tary, qyzanaq, pııaz, qııar, kúnbaǵys maıy, arpa jarmasy, untaq jarma, qant», - dedi statıstıka agenttiginiń basshysy. Onyń aıtýynsha, byltyr aqyly qyzmetterdiń 9,3 paıyzǵa qymbattaýy ınflıatsııaǵa aıtarlyqtaı úles qosty. Sonyń nátıjesinde baılanys, jolaýshy kóligi, bilim, densaýlyq saqtaý, turǵyn úı-kommýnaldyq qyzmetterdiń baǵasy edáýir qymbattady. «Mysaly, el aýmaǵynda ystyq sý orta eseppen 10,8 paıyzǵa, elektr energııasy 10 paıyzǵa, ortalyqtandyrylǵan jylytý 9,3 paıyzǵa qymbattaǵan. Bul jalpy respýblıka boıynsha kórsetkish, al jekelegen aımaqtar boıynsha kórsetkishterdiń keıde joǵary, keıde tómen ekeni túsinikti. Bunyń bári monopolııaǵa qarsy agenttiktiń tarıfterdi kóterý boıynsha sheshim qabyldaǵanyna baılanysty. Osynyń bári avtomatty túrde bizdegi esepteý bazasyna túsedi», - dep túsindirdi agenttik basshysy.