Byltyr Astanada tótenshe oqıǵalar kezinde 380 adam qutqaryldy
ASTANA. QazAqparat - 2016 jyly Astanada tótenshe oqıǵalar kezinde 380 adam qutqaryldy, dep habarlaıdy qala ákimdiginiń saıty .
TJD málimetterine sáıkes, 2016 jyly Astana qalasy aýmaǵynda 77 tótenshe jaǵdaı tirkeldi, onyń 80% tehnogendik sıpattaǵy tótenshe jaǵdaılar (tehnogendik - 62, tabıǵı - 15).
Byltyr elordada 811 órt tirkeldi, sonyń saldarynan materıaldyq shyǵyn 17 mln teńge boldy, órtten 19 adam qaza tapty, 58-i túrli dárejedegi jaraqat aldy.
TJ taldaýyna sáıkes, oqıǵalardyń 95%-y (846-dan 811) óndiristik jáne turmystyq órtterge tıesili, onyń ishindegi jartysynan kóbi turǵyn úı sektorynda (411 oqıǵa) tirkeldi. Osyny eskere otyryp, TJD qyzmetkerleri jergilikti polıtsııa qyzmetimen (JPQ) birge 49 myńnan asa kóp páterli jáne jeke turǵyn úılerdi aralap, úı ıelerine órt qaýipsizdigi talaptaryn saqtaý qajettiligi týraly jadynama taratty.
Jergilikti polıtsııa qyzmeti, jedel medıtsınalyq qyzmeti jáne ózge jedel qyzmettermen birge 18 jalpy garnızondyq órt-taktıkalyq oqý-jattyǵý ótkizildi, 3 respýblıkalyq komandalyq-shtabtyq oqý-jattyǵýlarǵa qatysty.
«112» jáne «101» jedel qyzmet telefondaryna 568 669 qońyraý kelip tústi. Qutqarý bólimsheleri 5 myń ret jedel attanyp, 380 adamdy qutqardy jáne 1 myń 383 adam evakýatsııalandy.
Sý aıdyny mańynda adam óliminiń aldyn alý maqsatynda 45 eskertý belgisi ornatylyp, sýdaǵy is-qımyl tártibine 630 bala oqytyldy, qala mektepterinde ashyq sabaqtar ótkizilip, onda 300 oqýshy qamtyldy.
Astana qalasynyń TJD bazasynda 380 oqý-jattyǵý ótkizilip, oǵan jergilikti atqarýshy organdar, ortalyq atqarýshy organdardyń aýmaqtyq bólimsheleri , 21 azamattyq qorǵaý qyzmeti men sanatqa jatqyzylǵan uıymdar jumyldyryldy.
