Byltyr Astanada ITV-juqpasyn juqtyrýdyń 99 oqıǵasy tirkeldi
ASTANA. 15 qańtar. QazAqparat - Elordada adamnyń ımmýnıtet tapshylyǵy vırýsyn juqtyrýshylar sany artyp otyr. Bul týraly Astana qalalyq JQTB-nyń (SPID) aldyn alý ortalyǵynan málim etti.
JQTB Ortalyǵynyń málimetteri boıynsha 2012 jyly Astanada ITV-juqpasyn juqtyrýdyń 99 oqıǵasy tirkeldi. Bul ótken jyldan 2 oqıǵaǵa kóp. Bıylǵy jyldyń 1 qańtaryndaǵy málimetter boıynsha, qalada ımmýnıtet tapshylyǵy vırýsyn juqtyrǵan barlyǵy 582 adam tirkelgen. Aýrý kórsetkishi 100 myń turǵynǵa - 81,1-den ( 01.12.12 jylǵy respýblıkalyq kórsetkish - 117,4) keledi.
«ITV- juqtyrýshylardyń jalpy sanynyń 40,4 paıyzyn (235 adam) esirtki paıdalanýshylar, sonyń ishinde bas bostandyǵynan aıyrylǵandar quraıdy. Al 52,9 paıyzy (308 adam) - retsiz, saqtanbaı jynystyq qatynasqa baratyndar bolsa, olardyń 3,8 paıyzy (12 adam) - seks-ındýstrııa qyzmetshileri; 6,7 paıyzy basqa da jolmen (ish qursaǵy-0,3%, medıtsınalyq emes jolmen - 0,2%, belgisiz tásildermen - 5,9%, gomoseksýaldar arqyly -0,3%) juqtyratyndar», - delingen taratylǵan habarlamada.
ITV-juqtyrýshylar arasynda erlerdiń úles salmaǵy - 62,6%. ITV-juqtyrýshy erler men áıelderdiń araqatynasy - 1,7:1.
