Byltyr araq-sharap satylymy 2 ese artqan

ASTANA. QazAqparat – Bas prokýror Berik Asylov zańdylyqty, quqyqtyq tártip pen qylmysqa qarsy kúresti qamtamasyz etý jónindegi úılestirý keńesiniń otyrysynda túnde araq-sharap satýǵa salynǵan tyıymnyń paıdasy az ekenin aıtty, dep habarlaıdy QazAqparat tilshisi.

«Balalar arasyndaǵy qylmys pen olardyń quqyǵyna qol suǵý problemasy ózekti bolyp tur. Turmystyq kıkiljiń sebebinen týyndaǵan qylmystar qoǵamda rezonans týǵyzyp júr. Onyń basty trıggeri – jumyssyzdyq, áleýmettik turǵydan qamsyzdandyrylmaý, tabystyń azaıýy, kóshi-qon jáne maskúnemdik», - dedi Berik Asylov.

Bas prokýrordyń aıtýynsha, ár qalada araq-sharapty túnde satyp alýǵa bolatyn jasyryn oryndar bar.

«Byltyrdyń ózinde ǵana ýytty alkogoldiń satylym kólemi eki esedeı artqan. Alkogoldi túngi ýaqytta satýǵa salynǵan tyıymnan paıda bolmaı tur. Ár qalada alkogoldi túnniń kez kelgen ýaqytynda satyp alýǵa bolatyn jasyryn oryndar bar jáne kópshilikke málim. Biz Shymkent, Almaty sııaqty 8 óńirge shyǵyp, ahýaldy zerttedik. Ókiletti organdardyń qyzmetindegi júıeli problemalardy anyqtadyq», - dedi Bas prokýror.