Byltyr analardyń 50 paıyzynyń ómirin arashalap qalýǵa bolar edi – mınıstrlik

NUR-SULTAN. QazAqparat - Byltyr qaza tapqan analardyń 50 paıyzynyń ómirin arashalap qalýǵa bolar edi. Bul týraly búgin QR Densaýlyq saqtaý mınıstrliginiń alqa otyrysynda atalǵan vedomstvonyń Taýarlar men kórsetiletin qyzmetterdiń sapasyn jáne qaýipsizdigin baqylaý komıteti tóraǵasynyń orynbasary Laýra Ahmetnııazova aıtty, dep habarlaıdy QazAqparat tilshisi.

«2019 jyly respýblıkada ana óliminiń 54 oqıǵasy tirkeldi. Tekserý nátıjesinde 27 jaǵdaıda nemese 50 paıyzynda ana ólimine jol bermeýge bolatyn edi dep tanyldy», - dedi ol.

Sondaı-aq ol ótken jyly sábı ólim-jitimi 5,9 paıyzǵa ulǵaıǵanyn, dúnıege kelgen 1 myń sábıdiń 8,4-i shetinep ketkendigin aıtty.

«Eń joǵary kórsetkish 7 óńirde tirkelip otyr. 2019 jyly komıtet Atyraý, Almaty jáne Aqmola óńirlerine baryp, sábı ólim-jitimine saraptama júrgizgen bolatyn. Sol saraptama birqatar júıeli problemany anyqtap berdi. Bul medıtsına uıymdary qyzmetiniń álsiz úılestirilgenin, medıtsına qyzmetkerleri biliktiliginiń jetkiliksizdigin dáleldeıdi», - dedi Laýra Ahmetnııazova.

Aıta keteıik, alqa otyrysyna qatysqan Úkimet basshysynyń orynbasary Eraly Toǵjanov ana ólimine nazar aýdaryp, Densaýlyq saqtaý mınıstrligine eki aptada ana óliminiń aldyn alý sharalaryn ázirleýdi tapsyrǵan bolatyn.