Byltyr Almaty oblysynda myń jarymǵa jýyq bala jaraqat alyp, aýrýhanaǵa túsken

TALDYQORǴAN. QazAqparat - Byltyr Almaty oblysynda myń jarymǵa jýyq bala jaraqat alyp, aýrýhanaǵa túsken. Dárigerler jaz aıy bastalǵaly beri medıtsınalyq kómekke júgingen balalardyń kóbeıgenin aıtady, - dep habarlaıdy QazAqparat tilshisi.

Balalar arasynda aıaq-qoly synyp, bas-mı jaraqatyn alǵan jáne jol-kólik oqıǵasynan zardap shekkender kóp.

Kópsalaly oblystyq balalar aýrýhanasynyń dırektory Toıbekov Arman Serikbaıulynyń aıtýynsha, kóp jaǵdaıda balalar ata-ananyń qaraýynsyz qalǵan kezde jaraqat alady. Bas dáriger aýrýhananyń travmatologııa bóliminde kishkentaı emdelýshiler sany 2021 jyly 32,7% – ǵa artqanyn aıtady.

«2021 jyly aýrýhananyń travmatologııa bóliminde ár túrli jaraqat alǵan 1433 bala em qabyldady. Onyń ishinde 89-y bir jasqa deıingi sábıler. Kóbine balalar ata-ananyń qaraýynsyz qalǵan kezde jaraqat alatyny belgili. Sondyqtan biz ata-analardan balalaryna muqııat bolýyn suraımyz», - deıdi aýrýhana dırektory Arman Serikbaıuly.

Sonymen qatar Kópsalaly oblystyq balalar aýrýhanasynyń bas dárigeri 2021 jyly jaraqat pýnkti ashylǵanyn aıtty.

«2021 jyldan bastap aýrýhanada jaraqat pýnkti ashyldy. Onda jumsaq tinderi zaqymdanǵan, kúıik shalǵan, ártúrli genezdegi jaralar, jándikter shaqqan taǵy da basqa jaraqat alǵan balalarǵa kómek kórsetiledi. Jaraqat pýnkti ashylǵan bir jarym jyl ishinde dárigerler 3504 balaǵa medıtsınalyq kómek kórsetti», - dedi bas dáriger.

Esterińizge sala ketsek, Kópsalaly oblystyq balalar aýrýhanasynda 2021 jyldyń qańtar aıynan bastap 55 tósek-oryndyq jaraqat bólimi ashyldy. Jaraqat bóliminde travmatologııalyq, neırohırýrgııalyq, ortopedııalyq, oftalmologııalyq kómek kórsetiledi.