Byltyr Almaty oblysynda 26 myńnan asa turaqty jumys orny ashyldy
TALDYQORǴAN.QazAqparat - 2017 jyldyń qorytyndysy boıynsha Almaty oblysynda 26 240 turaqty jumys orny ashyldy. Jumysqa ornalastyrý týraly óńirdiń ýákiletti organdaryna 48 390 adam júginse, onyń 32 362-si eńbekpen qamtylǵan, dep habarlaıdy QazAqparat Almaty oblysy ákiminiń baspasóz qyzmetine silteme jasap.
Qoǵamdyq jumysqa 10 120 adam tartyldy. Jalpy somasy 3149,3 mln teńge bolatyn áleýmettik kómek túrleri 146,9 myń adamǵa kórsetilgen, sonyń 768,6 mln teńgesi 37,7 myń adamǵa - az qamtylǵan otbasylarynyń 18 jasqa deıingi balalaryna, 104,3 mln teńgesi 2,6 myń adamǵa - memlekettik ataýly áleýmettik kómek retinde berilgen.
Elbasynyń bıylǵy Joldaýynda aıtylǵan mindetterge baılanysty jumyspen qamtý salasyna da birqatar jańalyqtar engizilýi tıis. Osy oraıda óńir basshysy Amandyq Batalov Joldaýdy talqylaýǵa baılanysty ótken aktıv jıynynda tıisti mekemelerge naqty tapsyrmalar bergen bolatyn. Solardyń qatarynda Jumyspen qamtýdyń Jol kartasyn júzege asyrýdyń tıimdiligin arttyrý, Jumyspen qamtý ortalyqtarynyń jumysyn tsıfrlandyrýdy uıymdastyrý, áleýmettik ataýly kómektiń jańa formatqa kóshýine baılanysty ortalyq jumysyn jańa júıege beıimdeý, jańa formattaǵy áleýmettik ataýly kómek alatyndardyń sanyn naqtylaý isi de bar.
«Oblystyq elektrondy eńbek bırjasyn Biryńǵaı respýblıkalyq bırjamen biriktirýdi qamtamasyz etý qajet. Biryńǵaı elektrondy eńbek bırjasynyń engizilýi jumys tabýda úlken múmkindikterge jol ashady. Bul oraıda azamattardyń kompıýterlik saýattylyǵyn arttyrýymyz kerek», - degen edi oblys ákimi A. Batalov.
