Byltyr áleýmettik shyǵystar 910 mlrd teńgege ulǵaıdy - Erulan Jamaýbaev

NUR-SULTAN. QazAqparat – Byltyr áleýmettik shyǵystar 2020 jylmen salystyrǵanda 910 mlrd teńgege ulǵaıdy. Bul týraly Májilistiń jalpy otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde QR Premer-Mınıstriniń orynbasary – Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«2021 jyly respýblıkalyq bıýdjettiń atqarylýy koronavırýs pandemııasynyń teris áserleri jaǵdaıynda júzege asyryldy. Degenmen, 2020 jylmen salystyrǵanda iskerlik belsendiliktiń jandanýy baıqaldy. Jalpy, ishki ónimniń ósimi 4 paıyzdy qurady. Ekonomıkanyń barlyq negizgi salalarynda oń nátıjege qol jetkizildi. Máselen, ónerkásip óndiris kólemi 3,8 paıyzǵa, qurylys 7,6 paıyzǵa, kólik jáne saýda salalary tıisinshe 3,6- paıyzǵa jáne 9,2 paıyzǵa ósti. Jahandyq pandemııadan keıin qalyptasqan suranysty jáne óndirister men logıstıkalyq tizbekterdiń buzylýyn qalpyna keltirý aıasynda taýarlar men kórsetiletin qyzmetterge baǵanyń jappaı ósýi baıqaldy», - dedi E. Jamaýbaev

Osy oraıda 2021 jyldyń qorytyndysy boıynsha ınflıatsııa deńgeıi 8,4 paıyzdy quraǵanyn eske saldy.

«Negizgi kapıtalǵa salynǵan ınvestıtsııalar kólemi 3,5 paıyzǵa ulǵaıdy. Jumyssyzdyq 4,9% deńgeıinde saqtaldy», - dedi mınıstr.

E. Jamýbaev Respýblıkalyq bıýdjettiń atqarylýy kórsetkishterine toqtala kele: « túsimder 100,8 paıyzǵa atqarylyp, 12,7 trln teńgeni qurady. Shyǵystar 99,2 paıyzǵa ıgerildi jáne 15,2 trln teńgeni qurady. Áleýmettik shyǵystar 2020 jylmen salystyrǵanda 910 mlrd teńgege ulǵaıyp, 7,5 trln teńgeni qurady. Bul respýblıkalyq bıýdjettiń jalpy kóleminiń 50 paıyzyn qamtydy», - dedi ol.