Byltyr Ádilet mınıstrligi halyqqa quqyqtyq kómek kórsetýge 881 mln. teńge jumsady
Bul týraly búgin Parlament Májilisiniń spıker Nurlan Nyǵmatýlınniń tóraǵalyǵymen ótken otyrysynda «Memleket kepildik bergen zań kómegi týraly» zań jobasy jóninde baıandaǵan mınıstr Berik Imashev málim etti.
Ádilet mınıstriniń paıymynsha, memleket kepildik bergen zań kómegin kórsetetin sýbektilerdiń ashyqtyǵynan qalyptasady. Bul olardyń qoǵam men memleket aldynda qoljetimdiligi men eseptiligin bildiredi. Osyǵan oraı, zań jobasynda advokattardyń, advokattar alqasynyń aýmaqtyq ádilet organdarynyń aldyndaǵy eseptiligi, sondaı-aq «Internet» jelisinde saıtta memlekettik zań kómegi júıesine qatysýshy advokattardyń tizimin ornalastyrý kózdeledi.
«Búgingi kúni quqyqtyq aqparattandyrý jáne konsýltatsııa berý halyqqa memlekettiń quqyqtyq kómek kórsetýdiń eń keń taraǵan tásili bolyp qalatynyn atap ótý kerek. Memleket ony iske asyrýǵa úlken qarjy qarajatyn bólýde. Máselen, 2012 jyly tek Ádilet mınıstrligine ǵana respýblıkalyq bıýdjetten halyqqa kómek kórsetýge, quqyqtyq aqparattandyrý jáne konsýltatsııa berýge 881 mln. 148 myń teńge kózdelgen. Atap aıtqanda, 500 mln. teńge «Ádilet» derekqorynyń tegin jumys isteýine, «Quqyqtyq nasıhat» baǵdarlamasyna - 80 mln.teńge, Quqyqtyq aqparat qyzmeti- Call-ortalyqqa - 47 mln. teńge derlik jáne taǵy basqalary», - dedi mınıstr. Onyń aıtýynsha, jalpy quqyqtyq kómek pen quqyqtyq nasıhatty uıymdastyrý boıynsha jumys 2012-2014 jyldarǵa arnalǵan Qazaqstan Respýblıkasy azamattarynyń quqyqtyq mádenıetiniń deńgeıin arttyrý jónindegi keshendi josparyna sáıkes júrgiziledi.
